Heimsmeistarmóti íslenska hestsins lauk í gær, en mótið fór fram í Sviss.
Athygli vakti að Jóhann Rúnar Skúlason var mættur til keppni á nýjan leik, en hann var rekinn úr íslenska landsliðinu þegar upp komst að hann hefði nauðgað þrettán ára stúlkubarni árið 1993.
Skagfirðingurinn Jóhann Rúnar er margverðlaunaður knapi og var til dæmis tilnefndur sem Íþróttamaður ársins árið 2019, en þar hafnaði hann í tólfta sæti. Sem hestamaður hefur hann í raun unnið allt sem hægt er að vinna, valinn knapi ársins hjá Landssambandi hestamannafélaga; margfaldur heimsmeistari á heimsmeistaramóti íslenska hestsins.
Einnig hefur hann unnið marga sigra á heims- og Norðurlandamótum og hann hefur tekið þátt í heimsmeistaramótum íslenska hestsins síðan 1997 og unnið á annan tug heimsmeistaratitla í hestaíþróttum sem og allnokkra Norðurlanda- og Danmerkurmeistaratitla. Jóhann Rúnar er því án efa einn besti knapi Íslandssögunnar.
Eftir að Mannlíf fjallaði um mál Jóhanns Rúnars árið 2021 var honum vikið úr íslenska hestalandsliðinu:
„Stjórn Landssambands hestamannafélaga (LH) og landsliðsnefnd hafa tekið ákvörðun um að víkja einum landsliðsmanni úr landsliðshópi Íslands í hestaíþróttum. Ákvörðunin er tekin í ljósi nýtilkominna upplýsinga um dóm sem landsliðsmaðurinn hlaut fyrir kynferðisbrot, en stjórn sambandsins og landsliðsnefnd hafði ekki verið kunnugt um dóminn,“ sagði í yfirlýsingu sambandsins.
Jóhann Rúnar hefur lengi verið búsettur í Danmörku og unnið þar í tengslum við hestamennsku.
Hann var sömuleiðis kærður og sakfelldur fyrir heimilisofbeldi í Danmörku gegn þáverandi eiginkonu sinni og er því á sakaskrá þar í landi sem og á Íslandi.
Þrátt fyrir þessa fortíð er Jóhann Rúnar meðlimur í danska landsliðinu í hestaíþróttum og keppti hann í nokkrum greinum fyrir hönd Danmerkur á heimsmeistaramótinu sem lauk í gær, eins og áður sagði.
