Dóra Björt Guðjónsdóttir, borgarfulltrúi Samfylkingarinnar, gagnrýnir RÚV harðlega í nýrri Facebook-færslu og veltir þar upp hvort ríkisfjölmiðillinn sé í raun kominn í kosningabaráttu fyrir Sjálfstæðisflokkurinn.
Tilefnið er umfjöllun RÚV um svokallað bensínstöðvamálið aðeins sex dögum fyrir sveitarstjórnarkosningar.
„Það var eiginlega með ólíkindum að horfa á kvöldfréttir RÚV í fyrrakvöld. Sex dögum fyrir kosningar er bensínstöðvamálið blásið upp á ný, án þess að nokkuð nýtt hafi komið fram. Engin ný gögn. Engar nýjar ákvarðanir,“ skrifar Dóra Björt.
Hún segir ekkert réttlæta tímasetningu fréttarinnar og heldur því fram að málið hafi verið „endurhitað“ á nákvæmlega réttum tíma í pólitískum tilgangi.
„Nánast eins og fréttin hafi legið tilbúin í skúffu mánuðum saman og einfaldlega verið dregin fram á nákvæmlega ,,rétta“ augnablikinu,“ skrifar hún.
Dóra Björt bendir á að framkvæmdir við lóð við Egilsgötu hafi staðið yfir í marga mánuði og skipulagið verið afgreitt löngu áður en skýrsla um bensínstöðvar leit dagsins ljós.
„Hver er þá fréttin nákvæmlega? Tímasetningin er fréttin,“ segir hún.
Í færslunni sakar hún jafnframt Sjálfstæðisflokkinn um að hafa lengi beitt neikvæðri kosningabaráttu rétt fyrir kosningar og segir það sem veki sérstaka athygli nú sé að ríkisfjölmiðillinn virðist taka þátt í henni.
„Sjálfstæðisflokkurinn hefur alla tíð verið duglegur við að moka drullu inn í lokasprett kosningabaráttu. Það sem stingur núna er að ríkisfjölmiðillinn virðist ekki aðeins hlaupa með þá bolta heldur jafnvel sparka þeim af stað sjálfur,“ skrifar hún.
Hún nefnir einnig að fréttamaðurinn sem hafi leitt umfjöllunina hafi „augljós tengsl inn í Sjálfstæðisflokkinn og fjölskyldutengingar við harða gagnrýnendur meirihlutans“, þó hún taki fram að það þurfi ekki eitt og sér að þýða neitt.
Að hennar mati vakna engu að síður spurningar um forgangsröðun og hlutleysi hjá RÚV.
„Þegar RÚV ákveður að endurhita gamalt mál korteri fyrir kosningar án nýrra upplýsinga eða nýlegra atburða sem skýra tímasetninguna, þá er eðlilegt að fólk spyrji sig: Er verið að upplýsa almenning, eða hafa áhrif á kosningar?“ skrifar Dóra Björt.
María Sigrún hafnar ásökununum
María Sigrún Hilmarsdóttir, fréttamaður hjá RÚV, hafnar því að umfjöllun hennar um svokallaðar bensínstöðvalóðir hafi verið pólitískur áróður fyrir Sjálfstæðisflokkurinn, líkt og Dóra Björt heldur fram í færslu sinni.
Í svari við fyrirspurn Samstöðvarinnar segir María Sigrún að fréttin hafi fyrst og fremst fjallað um mikla verðhækkun á einni lóð.
„Það hefur hvergi komið fram áður og skrýtið að það teljist ekki fréttnæmt. Í fréttinni er verið að varpa upp mynd af því hvað hefur gerst síðan borgin afhenti olíufélögunum þær með byggingarrétti,“ segir hún.
Samkvæmt fréttinni hafi ein bensínstöðvalóð hækkað um 518 milljónir króna á 20 mánuðum án þess að framkvæmdir hæfust á svæðinu.
Hvað varðar fjölskyldutengslin sem Dóra Björt minntist á segist María Sigrún ekki átta sig á hvaða tengsl það eigi að vera.
„Ég veit ekki um hvaða fjölskyldutengsl er um að ræða en þetta eru 12 lóðir í Reykjavík. Við þekkjum öll einhverja sem eiga heima nálægt þessum lóðum svo ég skil ekki alveg,“ segir hún.
Hún segir jafnframt að umfjöllunin hafi fyrst og fremst snúist um verðmæti og fasteignaviðskipti.
„Fréttin snýst um gríðarleg verðmæti sem ganga kaupum og sölum,“ bætir hún við.
