Karlmaður hefur verið ákærður fyrir alvarleg brot í nánu sambandi gegn sambýliskonu sinni, samkvæmt ákæru sem lögð hefur verið fram hjá Héraðsdómi Reykjavíkur. Maðurinn er sakaður um ítrekað ofbeldi og hótanir gagnvart konunni árið 2023.

Morgunblaðið greindi frá málinu.

Samkvæmt ákærunni á maðurinn í september 2023 að hafa skellt konunni harkalega utan í baðherbergishurð og hurðarkamb á heimili þeirra og síðan hrint henni inn í sturtuklefa með þeim afleiðingum að hún hlaut sár á enni.

Síðar er hann sagður hafa gripið í handfang á bakpoka sem konan bar og kippt henni niður í gólf. Við það hlaut hún áverka á enni, blóðnasir og tannskemmdir.

Í ákærunni kemur einnig fram að maðurinn hafi sent konunni líflátshótanir á samfélagsmiðlum.

„Ég drep þig. Ég sver ég fokking kyrki þig.“ „Fokking horaður. Screenshottaðu bara líkið þitt,“ skrifaði maðurinn í skilaboðunum.

Alvarlegasta brotið á að hafa átt sér stað í desember sama ár þegar maðurinn er sagður hafa tekið konuna kyrkingartaki þar til hún missti meðvitund og hlaut alvarlega áverka.