Fuglavernd stóð fyrir málþingi þann 31. október þar sem íslenskt votlendi var í brennidepli. Málþingið fór fram í Norræna húsinu og mættu um sextíu manns á staðinn, auk tæplega 160 sem fylgdust með í gegnum streymi.
Tíu sérfræðingar á ólíkum sviðum fluttu erindi um fugla, gróður, jarðveg, kolefnisbúskap, fiska og landnotkun. Þá flutti Rán Flygering hugvekju sem vakti mikla athygli, og Rannveig Magnúsdóttir stýrði fundinum af mikilli fagmennsku.
Menja von Schmalensee, formaður Fuglaverndar, setti fundinn og minnti á að stór hluti íslenskra fugla byggi afkomu sína á votlendi. Sagði hún það því eðlilegt að Fuglavernd beiti sér fyrir verndun þess og miðlun þekkingar um þessi mikilvægu vistkerfi.
Kallað eftir verndun og ábyrgð
Í ályktun sem fundargestir samþykktu í lok dags var skorað á stjórnvöld og almenning að bregðast við. Þar segir meðal annars að íslensk votlendi séu „sérstök og mikilvæg“ og verði að njóta betri verndar en nú sé raunin.
„Allt votlendi Íslands á að njóta verndar, óháð stærð. Enn er votlendi raskað, en nú er mál að linni,“ segir í ályktuninni.
Þá var hvatt til aukinnar endurheimtar votlendis, enda dugi núverandi verkefni ekki til. Fundargestir lögðu einnig áherslu á að brot á náttúruverndarlögum verði að hafa alvarlegar afleiðingar fyrir þá sem raska votlendi án leyfis.
Vilja sterkari lagavernd
Ályktunin kallar einnig eftir því að ábyrgðartegundir Íslands og tegundir í hættuflokkum fái lagalega stöðu sem tryggi betur vernd þeirra og búsvæða þeirra, þar á meðal votlenda.
Fundargestir hvöttu jafnframt opinberar stofnanir til aukins samstarfs og samráðs um náttúruverndarmál og beindu sérstakri hvatningu til umhverfis-, orku- og loftslagsráðherra um að „standa með náttúrunni“.
