Framsókn og óháðir hafa gengið til meirihlutasamstarfs við Viðreisn í bæjarstjórn Ísafjarðar eftir sveitarstjórnarkosningarnar. Þetta kemur fram í frétt Bæjarins Besta. Framsókn og óháðir komu sterk út úr kosningunum og fengu fjóra bæjarfulltrúa kjörna, á meðan Viðreisn fékk einn fulltrúa.
Nýr málefnasamningur meirihlutans, sem inniheldur 34 atriði, var undirritaður í stjórnsýsluhúsinu á Ísafirði í dag. Þar er meðal annars lögð áhersla á breytingar og uppbyggingu í skólamálum, áframhaldandi niðurgreiðslu skulda sveitarfélagsins og fjölbreyttar aðgerðir sem eiga að bæta lífsgæði íbúa á öllum aldri með sterkari innviðum og bættri þjónustu. Þá ætlar meirihlutinn einnig að vinna áfram að fjölgun verðmætra starfa á svæðinu.
Samkvæmt samkomulaginu verður Gylfi Ólafsson, bæjarfulltrúi Viðreisnar, nýr bæjarstjóri. Kristján Þór Kristjánsson, oddviti Framsóknar og óháðra, tekur við formennsku í bæjarráði og Elísabet Samúelsdóttir úr sama flokki verður forseti bæjarstjórnar.
„Ég er spenntur og auðmjúkur gagnvart nýju hlutverki. Ég bý að því að hafa verið í bæjarstjórn síðustu fjögur ár og þekki því ágætlega til flestra mála sem viðkoma rekstrinum. Það er traust milli okkar og Framsóknar. Við sækjum saman út frá miðjunni með hagsmuni bæjarbúa í fyrirrúmi,“ segir Gylfi Ólafsson.
Kristján Þór Kristjánsson segir Framsókn og óháða ánægða með samstarfið.
„Við í Framsókn og óháðum erum mjög ánægð með samkomulagið við Viðreisn. Framsókn var í minnihluta við upphaf síðasta kjörtímabils. Stefnan okkar þá var að vinna vel með meirihluta að öllum góðum málum sveitarfélaginu og íbúum til heilla. Við munum ekki breyta út af þeirri stefnu og vonumst til að vinna vel með öllum flokkum í bæjarstjórn,“ segir hann.
Hann bætir við að flokkurinn vilji styðja góð mál óháð því hvaðan þau komi.
„Það skiptir ekki máli hvaðan gott kemur og tökum við vel í öll mál sem við teljum bæta hag eða líðan íbúa í sveitarfélaginu,“ segir Kristján.
Ný bæjarstjórn tekur formlega til starfa 4. júní og nýr bæjarstjóri hefst störf degi síðar.
