Harðar umræður sköpuðust inni á Facebook-hópnum Markaðsnördar á dögunum þar sem heilsu- og líkamsklíníkin The House of Beauty var sökuð um að fegra ásýnd sína um of með gervigreindartækni. Gagnrýnendur segja myndmálið á vefsíðu fyrirtækisins grafa undan trausti á þeim meðferðum sem þar eru seldar.
Það var Ragnhildur Jóhannsdóttir sem hóf umræðuna og benti á að fyrirtækið, sem leggur áherslu á heilsu og raunverulegan árangur, skreyti vefsíðu sína með fólki sem búið er til af gervigreind (AI).
„Skiptir máli að vita hverjum þú getur treyst!“ skrifar Ragnhildur í færslu sinni. „Þetta segir fyrirtæki sem skreytir sig og alla sína vefsíðu með gervigreindar fólki, mis margir fingur, misjafn bakgrunnur og mögulega eru þessar konur ekki einu sinni til.“
Hún bætir því við að ef fyrirtækið sé leitað uppi á Google komi í ljós myndir af raunverulegum, flottum konum sem starfa eða starfað hafa þar, og skilur því lítið í þessari tæknivæðingu myndmálsins. „Eitt er víst að fyrirtæki sem auglýsir sig með gervigreind frá a-ö er ekki treystandi að mínu mati.“
„Auka fingur komi sér vel í fegrunaraðgerðum“
Færsla Ragnhildar vakti fljótt athygli og fóru meðlimir hópsins á kostum í athugasemdum. Meðal þeirra sem tjáðu sig var Sunna Ben, sem sló á létta strengi og sagði: „Tjah kannski auka fingur komi sér vel í fegrunaraðgerðum!“ en algengur fylgifiskur gervigreindarmynda af fólki er einmitt erfiðleikar tækninnar við að teikna hendur og fingur rétt.
Ekki voru þó allir á sama máli og reyndu sumir að verja stofuna. Kristján Jakobsson benti á að um mjög vinsælt fyrirtæki væri að ræða sem hefði hjálpað mörgum með verki. Sagði hann leiðinlegt að sjá „svona hatur“.
Ragnhildur svaraði þeirri gagnrýni fljótt fullum hálsi og sagðist alls ekki vera að ráðast á fyrirtækið eða þjónustuna sem slíka, heldur einungis vinnulagið í markaðssetningunni.
„Ég set alls ekki út á fyrirtækið sem slíkt enda þekki ég það ekki, en hinsvegar segi ég og stend við það að fyrirtæki sem notar gervigreind með þessum hætti er ekki treystandi,“ sagði Ragnhildur og skaut jafnframt á Kristján fyrir að fara í manninn en ekki málefnið. „Hate og gagnrýni eru ekki sami hluturinn.“
Vaxandi umræða hefur verið í samfélaginu um notkun gervigreindar í auglýsingum og hvar mörkin liggja þegar kemur að því að sýna raunverulegt fólk og raunverulegan árangur, sérstaklega í geira sem snýr að heilsu og útliti.
