Helga Vala Helgadóttir, lögmaður og fyrrverandi þingkona Samfylkingin, gagnrýnir harðlega fordóma gagnvart fólki með geðrænar áskoranir í kjölfar fréttar Vísis um að hætt hafi verið við fyrirhugað skjólshús Geðhjálpar, vegna andstöðu íbúa í hverfinu.

Í Facebook-færslu segist Helga Vala óttast að fordómar gagnvart fólki í viðkvæmri stöðu fari vaxandi.

„Ég er ansi hrædd um að fordómar gagnvart fólki í viðkvæmri stöðu séu að margfaldast þessa dagana. Mögulega eru þeir bara að opinberast meira þegar svokallað „antivók“ hefur gefið veiðileyfi á minnihlutahópa,“ skrifar hún.

Helga Vala bendir á að um hafi verið að ræða heimili eða skjólshús fyrir fólk með geðrænar áskoranir en ekki spítala eða gistiskýli.

„Þetta er ekki spítali eða gistiskýli heldur heimili, skjólshús, sem veitir þjónustu á jafningjagrundvelli og hefur gefið mjög góða raun víða um heim,“ segir hún.

Þá vísar hún til yfirlýsingar frá Geðhjálp þar sem fram kemur að unnið hafi verið að kynningu á úrræðinu fyrir nágrönnum, en áður en til þess kom hafi starfsmaður úr heilbrigðisráðuneytinu haft samband við íbúa í nágrenninu til að vara þá við áformunum.

Helga Vala gagnrýnir það harðlega og segir viðbrögðin lýsa skorti á samkennd.

„Hugsið ykkur hvað þetta er aumt. Engin samkennd eftir, bara einstaklingshyggja og fordómar,“ skrifar hún og endar færsluna á orðunum: „Svei þessu.“