Helgi Hrafn Gunnarsson, fyrrverandi þingmaður Pírata, gagnrýnir fordóma í umræðu um kynferðisofbeldi og innflytjendur í pistli sem hann birti á samfélagsmiðlum.
„Ég heyri karlmenn næstum því aldrei tala um kynferðisofbeldi nema þegar þeir tala um útlendinga,“ skrifar Helgi. Á sama tíma verði margir þeirra ósáttir þegar rætt sé um nauðgunarmenningu, virkt samþykki og mörk, þar sem þeim finnist ósanngjarnt að vera stimplaðir nauðgarar fyrir að vera karlmenn.
Hann segir slíkar alhæfingar vissulega ósanngjarnar, en bendir jafnframt á að sama eigi við þegar innflytjendur af tilteknum uppruna séu stimplaðir kynferðisafbrotamenn vegna brota einstakra einstaklinga. Að hans mati byggi hvort tveggja á sömu hugsun: að dæma fólk út frá kyni, uppruna eða litarhætti.
„Að fordæma fólk á grundvelli litarháttar, uppruna eða kyns, er rangt,“ skrifar Helgi Hrafn og bætir við að fordómar séu bæði ósanngjarnir og skaðlegir, óháð því hvaða hópi þeir beinast gegn.
Í pistlinum fjallar hann einnig um samfélagsleg vandamál og mismunandi tölfræði milli hópa, sem hann segir hvorki rétt að afneita né gera að aðalatriði. Lausnin við óheilbrigðum viðhorfum til kynferðislegrar hegðunar sé hins vegar fræðsla og samtal fremur en hatur og fordómar.
Helgi Hrafn segir baráttu fyrir slíkri fræðslu hafa sýnt sér að áhugi margra á lausnum hverfi þegar umræðan færist frá fordómum yfir í uppbyggilegt samtal. Að hans mati snúist umræðan því oft síður um vandamálin og frekar um að réttlæta ótta og hatur.
Hann segir að einungis sé hægt að ræða raunverulegar lausnir þegar fordómar séu teknir út fyrir sviga og umræðan byggð á „vitsmunahyggju og staðreyndum“.
