Lögreglan á höfuðborgarsvæðinu hafði í nógu að snúast í gærkvöldi og í nótt vegna umferðarlagabrota, fíkniefnamála, líkamsárásar og innbrots víðs vegar um umdæmið. Nokkrir ökumenn voru stöðvaðir grunaðir um akstur undir áhrifum fíkniefna og án gildra ökuréttinda.
Í Reykjavík voru þrír ökumenn stöðvaðir vegna gruns um akstur undir áhrifum fíkniefna. Við nánari athugun kom í ljós að allir þrír höfðu verið sviptir ökuréttindum. Einn þeirra var jafnframt á nagladekkjum þrátt fyrir árstíma. Mennirnir voru látnir lausir að lokinni blóðsýnatöku.
Þá var ökumaður stöðvaður í miðbæ Reykjavíkur eftir að hafa ekið gegn rauðu ljósi og málið afgreitt á vettvangi. Í Garðabæ var annar ökumaður mældur á 112 kílómetra hraða þar sem hámarkshraði er 80 kílómetrar á klukkustund og hlaut hann sekt vegna brotsins.
Einnig voru tveir ökumenn stöðvaðir vegna ástands bifreiða sinna. Í Reykjavík var ökumaður stöðvaður vegna filma í framrúðum og boðaður í skoðun, en í Kópavogi reyndust afturljós bifreiðar óvirk og var ökumaður einnig boðaður í skoðun.
Lögregla handtók mann í hverfi 105 vegna vörslu fíkniefna. Hann var látinn laus að lokinni skýrslutöku. Þá var annar maður handtekinn í sama hverfi grunaður um líkamsárás og vistaður í fangageymslu.
Að auki barst tilkynning um innbrot og þjófnað úr gámi í Hafnarfirði. Gerandi var óþekktur.
