Alþjóðlegur minningardagur um Nakba verður haldinn hátíðlegur 15. maí en dagurinn markar upphaf þeirrar atburðarásar sem Palestínumenn nefna Nakba, eða hörmungarnar, árið 1948. Af því tilefni verður efnt til samstöðugöngu upp Esjuna á morgun, laugardag þar sem þátttakendur hyggjast minnast fórnarlamba átaka síðustu áratuga og sýna palestínsku þjóðinni stuðning.
Í tilkynningu frá skipuleggjendum segir að dagurinn sé tileinkaður minningu þeirra sem hafa látist í átökum frá stofnun Ísraelsríkis og sérstaklega þeirra sem fallið hafa frá því að þjóðarmorðið á Gaza hófst í október 2023. Þar kemur einnig fram að aðstæður á Gaza séu enn afar alvarlegar þrátt fyrir vopnahlé að nafninu til.
Sérstök athygli er vakin á framtaki fjallgöngumannsins Mostafa Salameh sem er á leið á topp Mount Everest til að vekja athygli á stöðu Palestínumanna og safna fé til kaupa á lífsnauðsynjum fyrir íbúa Gaza.
Samstöðugangan fer fram laugardaginn 16. maí klukkan 10 og verður lagt af stað frá ysta bílastæðinu við rætur Esjan. Gengið verður upp að Steini og er fólki frjálst að fara á sínum eigin hraða. Það er félagið Ísland-Palestína sem stendur fyrir viðburðinum.
Nakba
Orðið nakba er arabíska og þýðir „hörmungarnar“ eða „áfallið mikla“. Það er hugtak sem Palestínumenn nota yfir þá atburði sem áttu sér stað í kringum stofnun Ísraelsríkis á árunum 1947–1949. Helstu þættir Nakba:
- Fólksflótti og brottvísanir: Talið er að um 750.000 til 800.000 Palestínumenn hafi neyðst til að flýja eða verið hraktir frá heimilum sínum.
- Eyðilegging þorpa: Yfir 400 palestínsk þorp voru lögð í rúst eða tæmd af ísraelskum hersveitum.
- Landmissir: Við lok stríðsins höfðu ísraelsk stjórnvöld tekið yfir miklu stærra landsvæði en áætlað var í upphaflegri skiptingu Sameinuðu þjóðanna.
Fólkið sem flúði og afkomendur þeirra mynda í dag stóran hluta palestínskra flóttamanna. Þessara atburða er árlega minnst þann 15. maí, en sá dagur er kenndur við Nakba-minningardaginn
