Mohammed Alkurd, palestínskur hælisleitandi á Íslandi, segir mótsagnakennt að hafa fengið tilkynningu um kosningarétt sinn á sama tíma og ákvörðun hafi þegar verið tekin um brottvísun hans úr landi.
Í Facebook-færslu sem hefur vakið athygli skrifar Mohammed, sem er frá Gaza-borg, að honum finnist rödd sín „meira velkomin en hann sjálfur“. Hann segir sér heimilt að taka þátt í ákvörðunum um framtíð landsins í sveitarstjórnarkosningum, en ekki að vera áfram í landinu til að upplifa niðurstöðurnar.
„Ég get kosið í kosningunum… en ég get ekki verið áfram til að sjá niðurstöðuna,“ skrifar hann og bætir við: „Lýðræði er fallegt… nema þegar það stoppar við rétt manns til að fá að vera áfram.“
Í athugasemd við færsluna segir Mohammed að honum sé ekki heimilt að vinna og að hann upplifi sig stundum „eins og fanga utan fangelsis“. Hann segir að hann hafi ekki fengið fjárhagsaðstoð frá ríkinu síðan hann þurfti að hætta störfum í júlí á síðasta ári vegna strangari reglna.
„Það eina sem ég get gert núna er að bíða, í von um að lögfræðingurinn minn og nokkrir vinir geti fundið lausn svo ég verði ekki sendur úr landi,“ skrifar hann.
Hann lýsir jafnframt erfiðum félagslegum og fjárhagslegum aðstæðum og segist vona að mál hans verði tekið til endurskoðunar.
Í umræðum undir færslunni bentu aðrir á að útlendingar með lögheimili á Íslandi geti kosið í sveitarstjórnarkosningum, þótt þeir hafi ekki íslenskan ríkisborgararétt. Kona að nafni Drífa Björk útskýrði að slíkar reglur giltu einnig víða á Norðurlöndum og að hún sjálf hefði kosið í sveitarstjórnarkosningum erlendis án þess að hafa ríkisborgararétt þar.
