Það virðist krauma í mönnum í jarðfræðigeiranum en Þorvaldur Þórðarson eldfjallafræðingur hefur svarað Haraldi Sigurðssyni, sem er einnig eldfjallafræðingur. Haraldur hafði sakað Þorvald um að setja fram órökstudda spá um eldgos á Snæfellsnesi en Haraldur hefur sjálfur mikið rannsakað eldvirkni Snæfellsness
„Ég treysti gögnum frá góðum mælingum frekar en órökstuddum spám. En eins og karlinn sagði, ef þú spáir nógu oft, þá hittir þú á rétta niðurstöðu einhvern tímann,“ sagði Haraldur meðal annars um spá Þorvaldar um eldgos. „Það er ábyrgðarhlutverk þegar sérfræðingur kemur fram með spá um náttúruhamfarir. Gera skal kröfu um að slík spá sé styrkt með birtum gögnum. Svo er ekki hér og reyndar rangt farið með.“
Nú hefur Þorvaldur svarað Haraldi á samfélagsmiðlum. „Það má vel vera að spá mín um eldgos á Snæfellsnesi innan 3 ára reynist röng, en allar dylgjur um að hún sé rökstudd sendi ég aftur til föðurhúsanna,“ skrifar eldfjallafræðingurinn.
„Eins og sést á meðfylgjandi myndum af skjálftavirkninni í Mýrarfjöllum (önnur sýnir dreifingu á landfræðilegri staðsetningu skjálftanna og hin sýnir dýptardreifingu þeirra í skorpunni. Gögnin eru frá Veðurstofu Íslands), þá mynda skjálftarnir þétta þyrpingu við Grjótárvatnið og, eins og hefur verið bent á, þá eru lang flestir þeirra á 15-20 km dýpi. en, þrátt fyrir það þá eru nokkuð margir skjálftar sem teygja sig upp undir 10 km dýpið og jafnvel grynnra,“ heldur hann áfram.
Þá segir hann að ef þessi skjálftavirkni komi til vegna kvikusöfnunar þá bendi þétt skjálftavirkni á 10-15 km dýpt til þess að kvika sé að safnast fyrir um og rétt neðan við 20 kílómetrana.
„Sú staðreynd að skjálftavirknin í ákveðnum hrinum nái upp á 10-5 km dýpi er hægt að túlka á fleiri en einn veg. Þá er hægt að horfa fram hjá þessari staðreynd og einblína á dýpri skjálftana, það er ugglaust hægt að líta svo á a þeir komi til, einhverra hluta vegna, af kviku-söfnuninni á 20 km dýpi. Það er líka hægt að líta svo á að þeir komi til vegna þess að kvika sé að byrja að færa sig á grynnra dýpi, einhverskonar upphaf af kviku-söfnun ofar í skorpunni.
Nýjar rannsóknir á gosmyndunum á Snæfellsnesi (sjá texta úrklippur og meðfylgjandi myndir frá Kahl et al 2024 og Baxter et al 2023) sýna að í aðdraganda þessara eldgosa byrjar kviku-söfnunin á um 20 km dýpi og færir sig síðan upp á 10 km dýpi áður en kemur til eldgoss. Jafnframt benda þessar rannsóknir á að þegar svo er komið geti gos hafist með stuttum fyrirvara,“ skrifar Þorvaldur og birtir myndir máli sínu til stuðnings.
