Lögreglu var í gærkvöldi og nótt kölluð til vegna ýmissa verkefna, meðal annars vegna hnupls úr verslun, ölvunaraksturs og átaka milli einstaklinga. Þetta kemur fram í dagbók lögreglu.
Óskað var eftir aðstoð lögreglu vegna hnupls úr verslun og voru tveir aðilar síðar handteknir grunaðir um slíkt brot í öðru máli. Málin eru í rannsókn.
Fjórir ökumenn voru handteknir grunaðir um ölvun við akstur. Þá var einn ökumaður handtekinn grunaður um akstur undir áhrifum vímuefna auk þess sem hann er grunaður um brot á vopnalögum. Annar ökumaður var einnig handtekinn grunaður um akstur undir áhrifum vímuefna.
Lögregla hafði jafnframt afskipti af sjö ökumönnum sem voru stöðvaðir fyrir of hraðan akstur og fengu þeir sektir vegna brotanna.
Þá var óskað eftir aðstoð lögreglu vegna átaka. Ekki liggja fyrir frekari upplýsingar um meiðsl eða umfang þess máls að svo stöddu.
