Lögreglan hafði í nógu að snúast í umdæmum höfuðborgarsvæðisins síðasta sólarhringinn þar sem fjölmargir ökumenn voru stöðvaðir vegna ýmissa umferðarlagabrota, auk þess sem tilkynningar bárust um rúðubrot og eld í rafhlaupahjóli í hleðslu.

Í umdæmum lögreglunnar í Reykjavík voru nokkrir ökumenn stöðvaðir án gildra ökuréttinda.

Einnig voru ökumenn kærðir fyrir að nota farsíma án handfrjáls búnaðar við akstur í tveimur hverfum. Þá var ökumaður í Reykjavík sektaður fyrir að aka á negldum hjólbörðum utan leyfilegs tímabils.

Í Kópavogi og nágrenni voru tveir ökumenn stöðvaðir grunaðir um akstur undir áhrifum fíkniefna í. Þá var ökumaður í Hafnarfirði stöðvaður vegna gruns um ölvunarakstur. Að lokinni blóðsýnatöku var fólkinu sleppt.

Lögregla hafði einnig afskipti af fjölda ökumanna vegna hraðaksturs. Í Hafnarfirði voru þrír ökumenn mældir á 115, 116 og 133 kílómetra hraða á klukkustund þar sem hámarkshraði er 80 km/klst. Í Kópavogi voru fjórir ökumenn sektaðir fyrir hraðakstur, þar af einn sem mældist á 157 km hraða þar sem hámarkshraði er 80 km/klst.

Þá var tilkynnt um rúðubrot í Kópavogi þar sem gerandi var óþekktur.

Eldur kom einnig upp í Breiðholti þegar kviknaði í rafhlaupahjóli sem var í hleðslu.