Mannréttindadómstóll Evrópu kvað í gær upp tvo dóma í málum gegn íslenska ríkinu, og hafa þeir nú verið birtir á vef dómstólsins.
Í öðru málinu var það Ísland sem talið var hafa brotið gegn sáttmálanum þar sem málið fyrndist í meðförum lögreglu og dómsmálaráðherra tekur niðurstöðu dómsins alvarlega; segir mikilvægt að rýna niðurstöðuna og vinna áfram í því að bæta réttarstöðu brotaþola.
„Í stefnuyfirlýsingu ríkisstjórnarinnar er sérstaklega talað um kynbundið ofbeldi og það er ekki að ástæðulausu“ segir ráðherra og bætir því við að það sé algjört forgangsmál hjá henni og „ríkisstjórninni að brotaþolar upplifi öryggi og treysti yfirvöldum fyrir málum sínum“ en að það megi ekki gerast aftur „að mál fyrnist í meðförum lögreglu, það heggur í þetta traust og það er okkar að laga það. Við munum grípa til aðgerða.“
Dómsmálaráðherra boðar markvissar aðgerðir, hefur lagt sérstaka áherslu á málaflokkinn og boðar enn frekari aðgerðir í þeim tilgangi að auka vernd þolenda.
„Á undanförnum árum hefur verið unnið að úrbótum við meðferð kynferðisbrota í réttarkerfinu og stuðla að bættri upplifun og betri þjónustu við þá sem í hlut eiga“ og í dómsmálaráðuneytinu er nú verið að leggja „lokahönd á nýja landsáætlun um kynbundið ofbeldi gegn konum þar sem kynntar verða 24 aðgerðir í málaflokknum.“
Segir Þorbjörg að landsáætlunin eigi að tryggja skýrari yfirsýn yfir aðgerðir, úrræði sem og þjónustu og að í „nýju landsáætluninni verða aðgerðir um meðferð kynferðisbrota auk þess sem þar verður að finna aðgerðir sem innleiða eiga ákvæði Istanbúl samningsins sem er samningur Evrópuráðsins um forvarnir og baráttu gegn ofbeldi gegn konum og heimilisofbeldi.“
Mun dómsmálaráðherra einnig leggja fram frumvarp um breytingu á lögum um nálgunarbann og brottvísun af heimili ásamt aðgerðum til verndar þolendum og verða tillögur starfshóps sem falið var að yfirfara gildandi lög og aðgerðir tengdar þeim kynntar á næstu vikum.
Fyrr á þessu ári sendi dómsmálaráðherra refsiréttarnefnd bréf þar sem hún fór þess á leit við nefndina að athuga hvort tilefni sé til að endurskoða ákvæði almennra hegningarlaga er varða líkamsárásir með það fyrir augum að skerpa á skilum milli ákvæða hegningarlaga um líkamsárásir og þyngja refsimörk. Einnig samþykkti ríkisstjórnin tillögu dómsmálaráðherra um að fjölga stöðugildum innan lögreglu um fimmtíu þann 3. febrúar síðastliðinn. Með því verður almenn löggæsla í landinu efld ásamt því að málsmeðferðartími styttist:
„Það er nauðsynlegt að kerfið allt bregðist við auknum ofbeldisbrotum og það er skýrt í mínum huga að refsingar eigi að endurspegla alvarleika slíkra brota.“ segir Þorbjörg og tekur það skýrt fram að „við ætlum að senda skýr skilaboð um að ofbeldi á ekki að líðast og að kerfið allt kappkosti við að taka vel utan um brotaþola.“
Í báðum dómum er niðurstaðan þó sú að íslenska ríkið er ekki talið mismuna eða brjóta kerfisbundið gegn réttindum kvenna sem kæra kynbundið ofbeldi.
