Silja Bára Ómarsdóttir, rektor Háskóla Íslands, segir ákvörðun um að afturkalla bókun á hátíðarsal skólans vegna fyrirhugaðs fyrirlesturs um Ísland og Evrópusambandið hafa byggst á því hvernig viðburðurinn var auglýstur. Hópnum hefur einnig verið boðin notkun af öðrum sal.
Hannes Hólmsteinn Gissurarson og Ragnar Árnason, fyrrverandi prófessorar við Háskóla Íslands, hafa krafist opinberlega í bréfi þess að skólinn standi við leigusamning vegna fyrirlesturs Dr. Carl Baudenbacher, fyrrverandi forseta EFTA-dómstólsins.
Silja Bára segir við mbl.is að auglýsingar um fundinn hafi gefið til kynna að samtökin Áfram Ísland stæðu fyrir honum. Ákvörðunin snerist ekki um hver ætti að flytja erindið heldur hver stæði að bókun salarins.
Hannes og Ragnar hafna þeirri túlkun og segja Rannsóknarsetur um stjórnmál og efnahagsmál standa fyrir fundinum. Í auglýsingu sem birtist í Morgunblaðinu 6. ágúst hafi fundurinn verið í nafni þess, en merki Áfram Íslands og Almenna bókafélagsins jafnframt birst.
Í bréfinu benda Hannes og Ragnar á að lengi hafi tíðkast að utanaðkomandi samtök og aðilar eigi samstarf við stofnanir innan Háskóla Íslands um fundahald og kynningu viðburða. Segjast þeir ekki vita til þess að athugasemdir hafi áður verið gerðar við slíkt fyrirkomulag.
„Ég kannast ekki við að nokkur hafi gert það annar en einhverjar hugveitur sem Hannes Hólmsteinn heldur úti. Dæmi sem hann tók í pósti sem ég sá frá honum voru allt viðburðir sem rannsóknarsetur sem hann stendur fyrir auglýsa viðburði sem eru haldnir innan háskólans. Það eru ekki ótengdir aðilar úti í bæ sem taka það upp hjá sér að auglýsa viðburði sem aðrir standa fyrir,“ segir Silja.
Þá hefur lögfræðistofa Dr. Carl Baudenbacher sjálf greint frá því á vefsíðu sinni að hópurinn Áfram Ísland hafi bókað hann til að tala á fundinum
