Hanna Katrín Friðriksson atvinnuvegaráðherra segir Ísland standa framarlega á heimsvísu þegar kemur að réttindum hinsegin fólks en varar jafnframt við aukinni neikvæðri orðræðu og uppgangi öfgahreyfinga sem beini sjónum sínum að hinsegin fólki.
Þetta kemur fram í aðsendri grein Hönnu Katrínar á Vísi í tilefni Gleðigöngunnar.
Hanna Katrín bendir á að Ísland sé í þriðja sæti á Regnbogakorti ILGA-Europe, sem metur stöðu og réttindi hinsegin fólks í Evrópu. Þá sé landið í fyrsta sæti á réttindakorti TGEU, Trans Europe and Central Asia, auk þess sem Ísland tróni á toppi Spartacus Gay Travel Index yfir áfangastaði fyrir hinsegin ferðamenn.
Hún segir þessa stöðu hafa náðst með þrotlausri vinnu fjölda fólks, bæði innan og utan hinsegin samfélagsins. Sú barátta hafi jafnframt reynst mörgum dýrkeypt og kallað á miklar persónulegar fórnir þeirra sem staðið hafi í forgrunni hennar.
Hanna Katrín segir íslensk stjórnvöld áfram ætla að standa vörð um mannréttindi hinsegin fólks og vinna að frekari lagabótum.
Samhliða því varar hún við þróun sem orðið hefur vart við hér á landi og erlendis. Réttindi hinsegin fólks hafi í auknum mæli verið notuð sem pólitískt álitamál.
„Réttindi hinsegin fólks hafa þannig orðið pólitískur gjaldmiðill í höndum popúlískra stjórnmálamanna,“ skrifar Hanna Katrín.
Hún segir baráttu gegn réttindum hinsegin fólks, og sérstaklega trans fólks um þessar mundir, tengjast uppgangi skipulagðra öfgahreyfinga sem ógni grundvallargildum lýðræðisins, þar á meðal frelsi, jafnrétti og mannréttindum. Hún hins vegar nefnir ekki þessar öfgahreyfingar á nafn.
Áhrifanna hafi einnig orðið vart hér á landi með aukinni neikvæðri orðræðu, skemmdarverkum á regnbogafánum og hótunum um ofbeldi.
