Fjölmiðla- og Sjálfstæðismaðurinn Stefán Einar Stefánsson segir íslensk stjórnvöld þurfa að taka mun fastar á málefnum innflytjenda og hælisleitenda og telur að dæmum um árekstra ólíkra menningarheima hér á landi hafi fjölgað. Þetta kemur fram í viðtali við Sölva Tryggvason í hlaðvarpsþætti hans.

Stefán gagnrýnir meðal annars starfsemi mosku við Bústaðaveg og heldur því fram að konur séu aðskildar frá körlum við bænahald. Hann lýsir aðstöðunni sem „búri“ og segist hafa undir höndum myndbönd frá samkomum þar sem þetta sjáist.

„Þær biðja ekki með karlmönnunum, heldur eru settar inn í búr á meðan,“ segir Stefán. Hann telur að viðbrögðin yrðu allt önnur ef sambærileg aðgreining ætti sér stað innan Þjóðkirkjunnar.

Stefán vísar einnig til nýlegrar heimsóknar múslimapredikara til Íslands og fullyrðir að viðkomandi hafi talað fyrir því að íslenskt samfélag yrði íslamskt. Þá segir hann predikarann áður hafa sætt gagnrýni fyrir öfgafullar skoðanir í garð samkynhneigðra.

Í viðtalinu nefnir Stefán jafnframt atvik á landsmóti skáta á Akureyri. Þar hafi hópur ungra drengja frá Katar, að hans sögn, sýnt stúlkum óviðeigandi hegðun og áreitni. Hann segir lögreglu og barnaverndaryfirvöld hafa komið að málinu og hópnum að lokum verið vísað af mótinu.

Stefán telur þessi mál sýna að íslenskt samfélag þurfi að standa fastar vörð um þau gildi sem hér hafi verið byggð upp.

„Ég vil ekki búa í landi þar sem konur eru þvingaðar til þess að ganga með slæður eða landi þar sem ungir drengir telja sér það ekki samboðið að konur kenni þeim í skólastofunni,“ segir hann.

ESB ekki málið

Stefán gagnrýnir einnig stefnu ríkisstjórnarinnar í Evrópumálum og telur að stjórnvöld ættu frekar að einbeita sér að verðbólgu, vaxtastigi og ríkisfjármálum. Hann segir sóun innan opinbera kerfisins mikla og nefnir meðal annars byggingu nýs Landspítala og leikskólans Brákarborgar í því samhengi.

Hann segir að ríkisstjórnin eigi að leggja áherslu á að ná tökum á ríkisútgjöldum og efnahagsmálum áður en ráðist verði í frekari vegferð í átt að Evrópusambandinu.

„Það að fara í þessa Evrópusambandsvegferð mun ekki laga þau verkefni sem við stöndum frammi fyrir hér heima,“ segir Stefán.