„Skyldi maðurinn ekki skammast sín agnarögn fyrir að standa þarna á háum launum frá almenningi í landinu og fara með annað eins dómadagsþvaður?“ skrifar Illugi í færslu sinni á Facebook.
Illugi vitnar beint í ræðu Þórarins, þingmanns Framsóknarflokksins í Norðausturkjördæmi. Þar ræðir Þórarinn um eitt og annað, meðal annars fer hann ítarlega út í sögu Sæmundar Sæmundssonar sem var meðal annars skipstjóri á seglskipi við Eyjafjörðinn árið 1902. Að sögn Þórarins var Sæmundur frumkvöðull í útgerð Íslendinga vegna þess að á þessum tíma hafi Norðmenn verið ráðandi í útgerð við Íslandsstrendurnar.
„En ég tel að, að sú saga sem að við þurfum að segja, að, nú er ég bara rétt að byrja, frú forseti, á þessari sögu þannig að ég óska eftir því að vera settur á mælendaskrá því að, þessi saga er að mínu mati mjög merkileg hvað varðar og þetta tekur sennilega fimm sex ræður reikna ég með, þar sem að þessi saga verður greind og ég reyni svo að vera með upplýsandi og skemmtileg innlegg inn á milli sömuleiðis,“ sagði Þórarinn Ingi Pétursson á þingfundi klukkan hálf tólf í dag.
Þórarinn hefur flutt 100 ræður á núverandi löggjafarþingi en þar af hafa rúmlega 40 verið í umræðum um veiðigjaldið.
Í athugasemdum við færslu Illuga Jökulssonar taka mörg undir með honum og furða sig á hátterni alþingismanna.
„Og svo eru alþingismenn undrandi á því að þeir njóti ekki virðingar…!“ skrifar Edda Björgvinsdóttir leikkona í athugasemd.
