Utanríkisráðherra Íslands, Þorgerður Katrín Gunnarsdóttir, varar við því sem hún kallar „hræðsluáróður“ í tengslum við fyrirhugaða þjóðaratkvæðagreiðslu um áframhald aðildarviðræðna Íslands við Evrópusambandið. Þetta kemur fram í viðtali við breska miðilinn The Guardian.

Í viðtalinu segir Þorgerður að andstæðingar áframhaldandi viðræðna beiti svipuðum aðferðum og stuðningsmenn Brexit í Bretlandi fyrir útgöngu landsins úr Evrópusambandinu. Hún nefnir sérstaklega að dreifing falsupplýsinga og villandi málflutningur geti haft áhrif á umræðuna og niðurstöðu kosninganna.

„Ég óttast að við stöndum frammi fyrir Brexit-augnabliki,“ segir ráðherrann og vísar til þess að stuðningsmenn Brexit hafi farið með ósannindi í aðdraganda þjóðaratkvæðagreiðslunnar árið 2016.

Þá lýsir hún einnig áhyggjum af mögulegum erlendum áhrifum, meðal annars frá Rússlandi, og segir hættu á að utanaðkomandi aðilar reyni að hafa áhrif á íslenska umræðu með skipulagðri dreifingu falsupplýsinga.

Blaðamaður Morgunblaðsins verulega ósáttur

„Utanríkisráðherrann er farinn að ata auri erlendis á þá Íslendinga sem eru ósammála henni um Evrópumálin. Þ.e.a.s. meirihluta landsmanna. Um leið stórskaðar hún hagsmuni Íslands og stöðu þegar hún lætur eins og að hér séu stórir hópar að kalla eftir því að Ísland hverfi af innri markaði Evrópu. Það er nefnilega það sem gerðist með Brexit,“ skrifar fjölmiðlamaðurinn Stefán Einar Stefánsson um Þorgerði á samfélagsmiðlum.

„Þeir sem ekki vilja ganga í ESB vilja halda áfram góðu samstarfi við Evrópuþjóðir, halda í jákvæða hluta EES-samningsins sem hefur reynst afar hagfelldur, ekki aðeins fyrir Ísland heldur öll þau ríki sem hafa að honum komið. Frjáls viðskipti eru nefnilega undirstaða velmegunar, ekki endalaus samþjöppun yfirþjóðlegs ríkisvalds í Brussel,“ heldur hann áfram.

„Allt ber þetta keim af taugaveiklun í herbúðum utanríkisráðherrans. Hún er ráðalaus gagnvart því verkefni sem hún setti sér fyrir. Að troða Íslandi inn í ESB með góðu eða illu.“