Sérstakt og sögulegt timburhús, sem upphaflega stóð við Laugaveg 37B í Reykjavík, er komið á sölu í Tjarnabyggð í Sveitarfélaginu Árborg. Um er að ræða 59,5 fermetra einbýlishús sem reist var árið 1894 og hefur því yfir 130 ára sögu að baki.

Húsið var flutt á núverandi stað við Norðurgötu 21 árið 2023 og stendur nú á rúmlega 10 þúsund fermetra eignarlóð. Ásett verð er 61,9 milljónir króna.

Húsið er á tveimur hæðum með risi undir mansardþaki og er klætt bárujárni að utan, bæði á veggjum og þaki. Með flutningnum hefur eignin fengið nýtt umhverfi þar sem stór lóð gefur fjölbreytta möguleika til útivistar og frekari uppbyggingar.

Innra skipulag hússins samanstendur af flísalagðri forstofu, opnu eldhúsi og stofu með nýlegri svartri viðarinnréttingu, spanhelluborði og innfelldum heimilistækjum. Undir timburstiganum á milli hæða er geymsluskápur.

Baðherbergið hefur verið endurnýjað með flísum á gólfum og veggjum, innréttingu, tengi fyrir þvottavél og walk-in sturtu með sturtubotni úr náttúrusteini. Flísar eru frá Parka en hreinlætistæki frá Tengi.

Á síðustu árum hefur verið ráðist í ýmsar endurbætur á húsinu. Gluggar voru endurnýjaðir árið 2012 og gólfbitar ásamt einangrun í gólfi hafa verið endurnýjuð. Þá hefur verið skipt um vatns- og miðstöðvarlagnir og húsið er hitað með hitaveitu. Einnig er varmaskiptir á neysluvatni.

Við húsið er um 80 fermetra timburverönd með skjólveggjum og heitum potti auk yfirbyggðs grillskýlis. Á lóðinni hefur verið jarðvegsskipt á um 400 fermetra svæði í kringum húsið og rotþró verið fullfrágengin. Einnig fylgir timburskýli fyrir ruslatunnur.