Sólveig Skaftadóttir, sem skipar 4. sæti á lista Samfylkinganar í Kópavogi, segir brýnt að bæta aðstöðu fyrir hundaeigendur í bænum og gagnrýnir skort á lausagöngusvæðum fyrir hunda. Þetta kemur fram í pistli hennar á Vísi þar sem hún segir málefni hundaeigenda hafa verið eitt af þeim málum sem íbúar hafi hvað oftast rætt við hana um frá því hún fór í prófkjör í vetur.
Að hennar sögn hefur fólk úr öllum hverfum bæjarins kallað eftir fleiri og betri svæðum þar sem hægt sé að sleppa hundum lausum við öruggar aðstæður. Hún telur mikilvægt að byggja upp bæði stærri lausagöngusvæði og smærri hverfissvæði þar sem hundar og eigendur geti hist, æft sig saman, leikið hundakúnstir og notið útiveru.
Sólveig segir slíka uppbyggingu ekki aðeins gagnast hundaeigendum heldur samfélaginu öllu. Hún bendir á að regluleg hreyfing, umhverfisþjálfun og félagsþjálfun geri hunda öruggari í samfélaginu og geti jafnframt aukið öryggi og vellíðan þeirra sem óttast hunda.
Í pistlinum bendir hún einnig á að margir íbúar í Kópavogi sæki nú þjónustu og aðstöðu í önnur sveitarfélög, meðal annars á hundasvæði í Reykjavík og Garðabær. Hún segir það ekki ásættanlegt að næst stærsta sveitarfélag landsins hafi ekki byggt upp fullnægjandi aðstöðu fyrir hundaeigendur.
Þá tengir hún umræðuna einnig við skipulagsmál og þróun bæjarins á síðustu árum. Hún segir mikla þéttingu byggðar hafa leitt til fækkunar opinna og grænna svæða og telur mikilvægt að gera ráð fyrir útivistarsvæðum fyrir bæði fólk og dýr í framtíðarskipulagi bæjarins.
„Ég vil sjá hundavænni Kópavog. Ég held að sá Kópavogur verði einfaldlega betri fyrir okkur öll,“ segir Sólveig að lokum.
