Sólveig Anna Jónsdóttir, formaður Efling, gagnrýnir Alþýðusamband Íslands og BSRB harðlega fyrir auglýsingaherferð sem samtökin standa nú að í aðdraganda sveitarstjórnarkosninga.

Í Facebook-færslu segir hún að samtökin reki auglýsingaherferð á Facebook um leikskólamál án þess að minnast á stöðu ófaglærðs starfsfólks leikskóla.

„Ekki er þar minnst einu orði á hrikalega stöðu ófaglærðs starfsfólks leikskólanna (94% konur) þrátt fyrir glænýja könnun Vörðu, rannsóknarstofnunnar vinnumarkaðarins, sem rekin er af ASÍ og BSRB, um stöðu þessara kvenna,“ skrifar hún.

Sólveig Anna bendir á að allt ófaglært starfsfólk leikskóla séu félagsmenn í félögum innan ASÍ og BSRB.

Hún gefur jafnframt í skyn að niðurstöðum nýrrar könnunar sé haldið til hlés fram yfir kosningar.

„En eflaust hefur verið tekin ákvörðun um að fjalla ekki um niðurstöður könnunarinnar sem sýna fram á að konurnar sem vinna við að gæta barna annara eiga í miklum erfiðleikum með að sjá fyrir eigin börnum - fyrr en að kosningum loknum - þið getið velt því fyrir ykkur hversvegna svo er,“ skrifar hún.