Alma D. Möller heilbrigðisráðherra hefur ákveðið að setja Þórörnu Gró Friðjónsdóttur í embætti forstjóra Heilbrigðisstofnunar Austurlands (HSA) frá og með 1. júní næstkomandi. Tekur hún við starfinu þegar Guðjón Hauksson lætur af störfum til að taka við sem forstjóri Sjúkrahússins á Akureyri en þetta kemur fram í tilkynningu frá stjórnvöldum

Þórarna er með BS-próf í sálfræði og MS-gráðu í fjármálum fyrirtækja frá Háskóla Íslands. Hún hefur starfað hjá HSA undanfarin átta ár, meðal annars sem rekstrarstjóri á Egilsstöðum og Vopnafirði. Síðustu fjögur ár hefur hún gegnt stöðu framkvæmdastjóra mannauðs hjá stofnuninni.

Starf forstjóra HSA verður auglýst laust til umsóknar á næstu dögum. Gert er ráð fyrir að skipað verði í embættið til frambúðar frá 1. september næstkomandi og gegnir Þórarna því starfinu tímabundið fram að því.