Þórður Snær Skagfjörð Júlíusson, framkvæmdastjóri þingflokks Samfylkingarinnar, hefur bæst í hóp fjölmargra sem hafa sett út á orð og gjörðir Snorra Mássonar, varaformanns Miðflokksins, á undanförnum dögum.

Óhætt er að segja að varaformaðurinn hafi komið sér í hundakofann hjá mörgum eftir að hann gagnrýndi sýnileika regnbogafánans í grunnskólum landsins.

Þórður virðist ekki vera sérstakur aðdáandi Snorra ef marka má nýjan pistill sem hann birti í morgun.

„Miðflokkurinn hélt sig hafa dottið í lukkupottinn þegar bandarískir öfgamenn buðu honum á námskeið í hvernig eigi að veikja lýðræði, alþjóðasamvinnu og mannréttindi með því að pakka sundrungu sinni í falskar umbúðir skynsemi og fullveldisástar og beina henni beint gegn mörgum viðkvæmustu hópum samfélagsins,“ skrifar Þórður um málið.

„Helsti lottóvinningurinn átti að hafa verið að hafa fengið ungan varaformann til liðs við sig sem átti að virka sem segull á ungviðið í landinu vegna þess að hann birti kámug TikTok-vídjó af sér með andlitið of nálægt myndavélinni að „spyrja spurninga“ og „ræða það sem aðrir þora ekki að ræða“. Lykilatriði voru að vera andstyggilegur við minnihlutahópa og viðurkenna aldrei mistök heldur bregðast við gagnrýni með því að gera sig, gerandann, að fórnarlambi allra aðstæðna.“

Í umfjöllun sinni rifjar Þórður Snær upp fleiri dæmi um málflutning Snorra á síðustu mánuðum. Þar nefnir hann meðal annars sjónvarpsviðtal í Kastljósi í september, þar sem Snorri hafi haldið því fram að mannréttindabarátta hinsegin fólks væri „hugmyndafræði“ og að þeir sem gagnrýndu hana væru raunveruleg fórnarlömb umræðunnar.

Einnig bendir hann á að í desember hafi Snorri lýst andstöðu við EES-samninginn og talað fyrir takmörkunum á fjölda þeirra sem fá að setjast að á Íslandi. Þórður Snær gagnrýnir að slíkar yfirlýsingar hafi ekki fylgt skýrar útskýringar á því hvernig samfélagið ætti að þróast án samningsins eða hvernig skilgreina ætti hverjir teljist til „alvöru Íslendinga“.

Þá segir hann að í umræðunni hafi einnig komið fram svokallaðar „hundaflautur“ um að hvítir Íslendingar þurfi að eignast fleiri börn til að vernda þjóðina, sem og hugmyndir um breytingar á fæðingarorlofi og auknar heimagreiðslur.

„Aðrir forvígismenn Miðflokksins tóku þátt í þessum samkvæmisleik og sögðu Snorra ítrekað misskilinn eða vera bara að spyrja spurninga. Þegar vitleysan varð yfirgengileg var klykkt út með því að það ætti ekkert að taka allt alvarlega sem Snorri segir.

Hann segi enda oft bara eitthvað,“ skrifar hann að lokum.