Þorgerður Katrín Gunnarsdóttir fundaði í gær í utanríkisráðuneytinu með bandarísku öldungadeildarþingkonunum Lisa Murkowski og Catherine Cortez Masto, sem staddar eru hér á landi til að kynna sér stefnu íslenskra stjórnvalda í málefnum norðurslóða og ræða samskipti Íslands og Bandaríkjanna.

Á fundinum var meðal annars rætt um öryggis- og varnarmál á norðurslóðum, stöðuna í Úkraínu, tvíhliða samskipti ríkjanna og möguleg tækifæri til aukins samstarfs á sviði viðskipta og endurnýjanlegrar orku.

„Það var ánægjulegt að taka á móti Murkowski og Cortez-Masto hér í Reykjavík. Heimsókn þeirra undirstrikar ríkan áhuga á Bandaríkjaþingi á okkar nærsvæðum og mikilvægi þess að norðurslóðaríki vinni náið saman að brýnum hagsmunum í okkar heimshluta,“ segir Þorgerður Katrín. „Ég kynnti vitaskuld fyrir þeim áherslur Íslands í málefnum norðurslóða, nýja stefnu Íslands í varnar- og öryggismálum, en svo ræddum við djúp tengsl ríkjanna tveggja allt frá lýðveldisstofnun til dagsins í dag. Mikilvægt er að rækta það samband.“