Valur Sigurðsson hefur verið dæmdur í eins mánaðar skilorðsbundið fangelsi í Héraðsdómi Reykjavíkur fyrir að hafa ráðist á lögreglukonu við skyldustörf í september árið 2024.

Samkvæmt dómi málsins á atvikið sér stað að kvöldi 10. september 2024 í bílskúr í Reykjavík. Þar veittist Valur að lögreglukonu og hrinti henni á bílskúrshurð með þeim afleiðingum að hún hlaut tognun á litlafingri hægri handar auk yfirborðsáverka á úlnlið og handarbaki sömu handar. Lögreglukonan var við störf þegar árásin átti sér stað.

Valur játaði brot sitt skýlaust fyrir dómi.

Við ákvörðun refsingar var litið til þess að Valur á nokkurn sakaferil að baki sem nær aftur til ársins 2001. Meðal annars hafði hann árið 2019 verið dæmdur í 15 mánaða fangelsi fyrir meðal annars peningaþvætti og fíkniefnabrot. Þá hlaut hann árið 2025 tveggja mánaða skilorðsbundinn fangelsisdóm vegna fíkniefnabrots.

Dómurinn taldi þó að játning ákærða og yfirlýst iðrun ættu að horfa honum til málsbóta, auk þess sem nokkur tími væri liðinn frá því brotið var framið. Refsingin var því ákveðin eins mánaðar fangelsi, en fullnustu hennar frestað til tveggja ára gegn því skilyrði að hann haldi almennt skilorð.

Valur var jafnframt dæmdur til að greiða rúmlega 318 þúsund krónur í málsvarnarlaun verjanda síns og tæplega 51 þúsund krónur í annan sakarkostnað.