Nokkuð hefur borið á vasaþjófnaði við helstu ferðamannaperlur landsins á undanförnum mánuðum ef marka má færslur í Facebook-hópnum Bakland Ferðaþjónustunnar.

Í tveimur nýlegum færslum er bent sérstaklega á tvö atvik við Gullfoss en í öðru tilfellinu var birt myndband sem sýnir konu fara í vasa einstaklings sem gengur fyrir framan hana og ná í, að því virðist vera, veski.

Í hinu tilfellinu birtir Ástvaldur Jóhannesson mynd af tveimur konum sem hann segir að hafi verið að stunda vasaþjófnað á meðan hann var staddur þar.

Viðbrögðin hafa ekki látið standa á sér og hafa margir ritað athugasemdir við báðar færslurnar.

„Vasaþjófar eru ekki amatörar, þetta er atvinnugrein/útgerð. Þegar einhver er gámaður kemur annað teymi í staðinn. Fólkið er beinlínis "gert út" í leiðangra til að stela. Kemur til landsins í nokkra daga í sína leiðangra, allt skipulagt af þeim sem þau vinna fyrir,“ skrifar Marta Helgadóttir.

„Á ferðamannastöðum í Evrópu er byrjað að spreyja rauðu spreyi yfir vasaþjófa. Lögreglan er einfaldlega allt of langt í burtu til að hægt sé að láta svona lagað í friði. Þær labba smá hring og halda bara áfram eftir 3 mínútur,“ segir Unnar Sigurbjörnsson um málið.

Dagbjört Vilhjálmsdóttir stingur upp á því að berja eigi fólkið og kallar það hyski.