Björn Þorláksson, þáttastjórnandi á Samstöðinni og rithöfundur, segir umræðu um hið svokallaða „kreditkortamál“ borgarstjóra geta snúist upp í andhverfu sína ef haldið verði áfram að fjalla um málið fram að kosningum.
„Það er með hneykslisfréttir sem plantað er korteri fyrir kosningar, að áhrif þeirra verða stundum þveröfug miðað við ásetning lekaliða sem reyna að ná höggi á tiltekinn aðila, oftast keppinaut í gegnum blaðamenn.“ Þannig hefst Facebook-færsla Björns. Hann telur vissulega fréttnæmt að borgarstjóri hafi ekki kunnað rétt með kort borgarinnar að fara, en segir málið þó ekki stórfrétt.
„Að borgarstjóri hafi ekki kunnað að nota kort borgarinnar er frétt. En engin stórfrétt. Óþarfi að mjólka málið sólarhringum saman þótt það sé forvitnilegt. Fjárhæðir eru mjög lágar. Borgarstjóri skýrir mál sitt ágætlega,“ skrifar hann og bætir við að í samanburði við „tugmilljarða sukk og rányrkju sumra sambærilegra oddamanna hægra megin“ í gegnum tíðina sé líklegt að pólitíski skaðinn verði lítill.
Björn segir jafnframt að ef fjölmiðlar og pólitískir andstæðingar „mjólki málið“ fram að kjördegi gæti það fremur vakið samúð með Heiða Björg Hilmisdóttir og Samfylkingin. Fólki gæti fundist verið að ganga of hart fram gegn „vænni manneskju fyrir afar litlar sakir“.
„Ef meiningin er að klæmast á málinu allt fram á kjördag gæti fólki ofboðið og Samfó og Heiða fái þá samúðaratkvæði. Að fólki finnist þá sem verið sé að ata væna manneskju allt of miklum auri fyrir afar litlar sakir.“
Þrátt fyrir það segir Björn að skoðun sín á pólitískri framtíð Heiðu hafi ekki breyst og vísar til þess að hann hafi áður skrifað að hennar tími innan Samfylkingarinnar væri liðinn. Hann lýsir henni þó sem grandvarri og traustri stjórnmálakonu, sérstaklega gagnvart jaðarsettum hópum og efnaminna fólki.
Í lok færslunnar varar hann við því að fleiri sambærileg „hneykslismál“ kunni að birtast í fjölmiðlum á næstu dögum fyrir kosningar. Hann hvetur almenning til að sýna gagnrýna hugsun og segir pólitík stundum geta breyst í „óþverraiðju“ þar sem menn ráðist hver á annan.
„Ekki kæmi á óvart að fleiri keimlík "hneykslismál" dúkki upp í fjölmiðlum á næstu dögum. Almenningur þarf að vera vakandi, beita krítískri hugsun. Pólitík getur verið æðsta list hins mögulega en hún getur líka á tímapunktum sem þessum orðið óþverraiðja þar sem grandvart fólk breytist í blóðsugur og enginn er annars bróðir í leik...“
