Vörusendingafyrirtækið Wolt afhenti barni áfengi en þetta kemur fram í ítarlegri umfjöllun Heimildarinnar um netsölu á áfengi.
Blaðið pantaði áfengi á kennitölu 20 ára manns og lét senda í miðbæ Reykjavíkur og var sendill frá Wolt kominn á 20 mínútum. Þar tók 17 ára barn á móti áfenginu og var ekki kannað hvort viðkomandi væri kominn með aldur til að kaupa áfengi. Þurfti ungmennið aðeins að framvísa númeri sem fylgdi pöntuninni.
Mikil vonbrigði
Heimildin leitaði viðbragða hjá Jóhanni Má Helgasyni, framkvæmdastjóra Wolt á Íslandi, vegna málsins. Að sögn Jóhanns fá sendlar sérstaka þjálfun og þeim sé óheimilt að afhenda áfengi einstaklingum undir lögaldri. Til að draga úr hættu á slíkum brotum fá sendlar greitt fyrir ferðina jafnvel þótt afhending fari ekki fram og þurfa einnig að ljúka sérstöku námskeiði um afhendingu viðkvæmra vara, þar á meðal áfengis, sem byggir á kennslumyndböndum.
Jóhann segir það valda miklum vonbrigðum að heyra af málinu og leggur áherslu á mikilvægi þess að öryggi sé tryggt í þessu fyrirkomulagi áfengissölu. Hann segir málið tekið mjög alvarlega innan fyrirtækisins.
