Glúmur Baldvinsson, alþjóðastjórnmálafræðingur, gagnrýnir fyrrverandi forseta Íslands, Ólaf Ragnar Grímsson, harðlega í færslu á Facebook þar sem hann sakar hann um að láta eigin hagsmuni og sjálfhverfu ráða afstöðu sinni til alþjóðamála.
Tilefni skrifanna er frétt RÚV um orðaskipti Ólafs Ragnars og Þorgerðar Katrínar Gunnarsdóttur utanríkisráðherra. Ólafur Ragnar hefur gagnrýnt málflutning ráðherrans og sagt hana tala í „götustelpustíl“ eftir að hún sakaði hann um að ýta undir sjónarmið Rússa í tengslum við innrásina í Úkraínu.
Glúmur fer ekki leynt með skoðun sína á fyrrverandi forsetanum og segir hann hafa haft rangt fyrir sér í afstöðu sinni til mikilvægra alþjóðamála.
„Ólafur Ragnar er furðulegur fýr að því leytinu til að hann hefur alltaf rétt fyrir sér algjörlega þrátt fyrir að hann hefur og hafði aldrei rétt fyrir sér,“ skrifar Glúmur.
Hann rifjar meðal annars upp andstöðu Ólafs Ragnars við EES-samninginn, NATO og EFTA og segir hann hafa verið á móti framfaraskrefum Íslands á alþjóðavettvangi.
Glúmur gagnrýnir einnig tengsl Ólafs Ragnars við Kína og Rússland og telur að hann hafi með afstöðu sinni gengið gegn íslenskum og vestrænum hagsmunum. Hann segir hagsmuni fyrrverandi forsetans fyrst og fremst snúast um eigin frama og sjálfsmynd.
„Mesta vindhana sem Ísland hefir fætt og klætt,“ skrifar Glúmur um Ólaf Ragnar.
Í lok færslunnar vísar hann til þess að hafa hitt fyrrverandi forsetann í apóteki í Mosfellsbæ í síðustu viku.
„Sé eftir að hafa ekki rekið mig harkalegar í hann í apótekinu í Mosó í síðustu viku. Kannski næst,“ skrifar Glúmur og bætir við broskalli.
Deila um ummæli utanríkisráðherra
Í frétt RÚV kemur fram að Ólafur Ragnar hafni því að hafa lýst yfir stuðningi við sjónarmið Sergei Lavrov, utanríkisráðherra Rússlands. Hann segir það ekki fela í sér stuðning við efni skjals þótt hann veki athygli á því.
Þorgerður Katrín hefur hins vegar sagt að málflutningur Ólafs Ragnars hafi vakið athygli erlendra ráðamanna og að hún hafi þurft að útskýra ummæli hans og bakgrunn á alþjóðavettvangi.
Deilan snýst meðal annars um að Ólafur Ragnar deildi færslu Lavrovs á samfélagsmiðlinum X þar sem vakin var athygli á rússneskri greinargerð um Norðurslóðir.
Athugasemdir