Nýjar og alvarlegar ásakanir hafa komið fram á hendur Andrew Mountbatten Windsor, fyrrverandi Bretaprins, um að hann hafi nýtt einkaþotu Jeffrey Epstein til að flytja konur frá ýmsum löndum til Bretlands og komið þeim inn í Buckingham-höll án hefðbundinna öryggisráðstafana. Heimildir herma að dulnefni hafi verið notuð til að dylja ferðirnar.
Fyrrverandi forsætisráðherra Bretlands, Gordon Brown, hefur lýst því yfir að einkaþota Epsteins, svokölluð „Lolita Express“, hafi lent í Bretlandi um 90 sinnum. Hann hefur kallað eftir því að Andrew verði yfirheyrður af lögreglu og að Metropolitan-lögreglan taki fyrri rannsókn sína til endurskoðunar. Brown sagði að konur víðs vegar að úr heiminum hefðu verið fluttar til Bretlands og lýsti málinu sem „langmesta hneykslið af öllum“.
Samkvæmt heimildum hafi Andrew komið konum inn í höllina í gegnum bakdyr, án þess að þær væru skráðar hjá öryggisgæslu. Andrew hefur ítrekað neitað allri sök.
Dulnefni og hlýðni
Samkvæmt umfjöllun The Sun á Andrew að hafa beitt sérstökum kóðum til að tryggja að komu kvennanna væri haldið leyndri. Heimildir blaðsins segja að hann hafi sent skilaboð á borð við:
„Frú Windsor mun koma innan skamms, vinsamlegast hleypið henni inn og fylgið henni upp.“
Einn heimildarmaður lýsir því að þetta hafi verið endurtekið mynstur:
„Hann hringdi alltaf í vaktskrifstofuna og sagði nákvæmlega það sama, „Frú Windsor mun koma innan skamms, vinsamlegast hleypið henni inn og fylgið henni upp“. Þetta var alltaf í gegnum einn af starfsinnganginum sem eru úr augsýn.“
„Þetta var svo algengt að fólk ranghvolfdi bara augunum og sagði „já herra“. Þetta stóð yfir í mörg ár. Lífverðir konungsfjölskyldunnar hötuðu að vera settir á Andrew, hann var svo óþægilegur og fyrirlitlegur.“
Önnur heimild sagði að vegna stöðu Andrews í konungsfjölskyldunni hefðu fáar upplýsingar verið skráðar um konurnar:
„Þetta var reglulega rætt meðal hirðmanna, en aldrei gert neitt til að stöðva það.“
Tölvupóstar úr Epstein-skjölunum
Tölvupóstar sem birtir voru af bandarískum stjórnvöldum sem hluti af Epstein-skjölunum virðast sýna Andrew bjóða Epstein og „mjög sætri“ rúmenskri konu í kvöldverð í Buckingham-höll í september 2010, tveimur árum eftir að Epstein var dæmdur fyrir kynferðisbrot gegn ólögráða einstaklingi.
Í tölvupósti frá reikningi sem bar heitið „The Duke“ stóð:
„Við gætum borðað kvöldverð í Buckingham-höll og haft fullt næði.“
Epstein svaraði: „Bættu einum við … rúmensk, mjög sæt.“
Lögreglan undir þrýstingi
Nýjustu ásakanirnar koma fram skömmu eftir að greint var frá því að Thames Valley-lögreglan og saksóknarar hefðu átt viðræður vegna ásakana á hendur Andrew um misferli í opinberu starfi. Lögreglan hefur áður sagt að hún sé að kanna fullyrðingar um að Andrew hafi deilt trúnaðargögnum úr starfi sínu sem viðskiptafulltrúi Bretlands með Epstein.
Gordon Brown hefur jafnframt kallað eftir sérstakri rannsókn á mansali Epsteins í gegnum breska flugvelli. Hann sagðist vera „ algerlega sleginn“ yfir þeim upplýsingum sem fram komu um tugir flugferða sem notaðar voru til að flytja konur.
Í grein í The New Statesman skrifaði Brown:
„Það sem ég uppgötvaði um misnotkun kvenna af hálfu karlkyns rándýra og þeirra sem gerðu þeim það kleift, og hlutverk Bretlands sem enn hefur ekki verið viðurkennt, skók mig inn að merg. Þetta kallar á ítarlega lögreglurannsókn og er langmesta hneykslið af öllum.“
Brown sagði Epstein hafa montað sig af því í tölvupóstum að hann gæti notað Stansted-flugvöll til að flytja konur til Bretlands frá Lettlandi, Litháen og Rússlandi. Hann bætti við:
„Ég hef verið upplýstur um að fyrri rannsóknir tengdar fyrrverandi prinsinum Andrew hafi ekki skoðað lykilgögn um flugferðir með fullnægjandi hætti. Ég hef beðið lögreglu að taka þetta sérstaklega til skoðunar. Stansted-upplýsingarnar einar og sér krefjast þess að Andrew verði yfirheyrður.“
Athugasemdir