Sigfús Aðalsteinsson, oddviti Okkar borg í komandi borgarstjórnarkosningum, ætlar að „flæma alla múslima“ frá Íslandi. Þetta sagði hann á fundi Þvert á flokka sem haldinn var á Ölveri í Glæsibæ 25. mars síðastliðinn.
Fundurinn bar nafnið Baráttan um Ísland! og var auglýstur sem fundur um ástand landsmála. Frummælendur á fundinum voru þeir Helgi Magnús Gunnarsson, fyrrverandi vararíkissaksóknari, Arndís Ósk Hauksdóttir, fyrrverandi prestur og Sigfús Aðalsteinsson, stofnandi Ísland - þvert á flokka og oddviti Okkar borgar.
Færri en hundrað manns mættu á fundinn en aðalumræðuefnið á honum voru innflytjendamál.
Helgi Magnús, sem var gert að hætta störfum sem vararíkissaksóknari vegna ummæla hans um innflytjendur og samkynhneigða, hélt tæplega klukkustundalanga ræðu, þar sem hann fór mikinn í tali um múslima. Meðal þess sem hann sagði var að brátt muni „þeir allir vera á skeljunum niður við Lækjartorg að biðja“.
„Eftir stuttan tíma verða þeir allir á skeljunum niður við Lækjarstorg að biðja, til þess að troðast yfir allt og alla.“
Þá sagði Helgi Magnús að í þeim „Arabalöndum“ sem olía fannst í á sínum tíma, séu til peningar og spurði svo salinn hvað sé að gerast í hinum löndunum í Miðausturlöndum, og svaraði spurningunni sjálfur:
„Hvað er þetta, einn komma níu milljarðar? Það eru bara geitur og úlfaldar og döðlur, skiljiði.“ Áhorfendur skellihlógu af þessum orðum Helga en hann hélt áfram:
„Og þetta ætlum við að flytja inn, eitthvað fólk sem lifir aftur á miðöldum. Hvað haldið þið ef við höldum þessu áfram, og þeir fjölga sér hratt, hvað haldið þið að þjóðarframleiðslan á mann verði eftir 20 ár? Það verða fjórar döðlur og ein geit.“
Sigfús steig einnig á svið eins og fram hefur komið og sagðist ekki ætla að „hætta baráttunni“ fyrr en markmiðunum væri náð.
„Ég hætti ekki þessari baráttu fyrr en ég sé það að ég er búinn að flæma þessa múslima í burtu.“
Athugasemdir