Sjálfstæðisflokkurinn í Garðabær svaraði ekki tveimur fullyrðingum í kosningaprófi RÚV fyrir sveitarstjórnarkosningarnar, einn flokka. Um var að ræða fullyrðingarnar: „Hælisleitendur á barnsaldri ættu að fá sömu þjónustu í sveitarfélaginu og aðrir íbúar“ og „Sveitarfélagið þarf að auka fjárhagsaðstoð við þá íbúa sem lifa undir fátæktarmörkum.“
Almar Guðmundsson, bæjarstjóri Garðabæjar og oddviti flokksins í komandi kosningum, segir ástæðuna vera þá að spurningarnar hafi verið gallaðar.
„Báðar þessar spurningar eru gallaðar í framsetningu og því svöruðum við þeim ekki,“ segir Almar í svari við fyrirspurn Mannlífs.
Varðandi fullyrðinguna um hælisleitendur bendir hann á að engir hælisleitendur búi í Garðabæ.
„Varðandi hælisleitendur, þá eru engir með þá stöðu í Garðabæ og því ekki ástæða til að svara spurningunni. Hælisleitendur búa í nokkrum sveitarfélögum skv sérstökum samningum við yfirvöld. Enginn slíkur samningur er við Garðabæ.“
Hann tekur þó fram að börn flóttafólks eigi að njóta sömu þjónustu og önnur börn í bænum.
„Ef spurt hefði verið um börn flóttamanna, þá hefði svarið verið á þá leið að að sjálfsögðu eiga þau að fá sömu þjónustu og önnur börn. Og að sjálfsögðu er unnið eftir því í Garðabæ.“
Um fullyrðinguna varðandi fjárhagsaðstoð segir Almar að hugtakið „fátæktarmörk“ sé ekki nægilega skýrt skilgreint.
„Varðandi hina spurninguna þá er sjálfsagt að svara varðandi fjárhagsaðstoð almennt, en það liggja engar opinberar skilgreiningar á fátækramörkum fyrir eftir því sem við komumst næst.“
Hann segir Garðabæ leggja áherslu á að fjárhagsaðstoð sé veitt innan skýrs ramma og að grunnfjárhæð aðstoðar sé nú hærri í Garðabæ en til dæmis í Reykjavík.
„Garðabær fylgist vel með þróun þessara mála á landsvísu og endurskoðar viðmið reglulega. Í dag er grunnfjárhæð fjárhagsaðstoðar til einstaklinga og sambúðarfólks hærri í Garðabæ en til að mynda í Reykjavík.“
Athugasemdir