Reykjavíkurborg mun segja upp 86 starfsmönnum vegna umfangsmikilla breytinga á stjórnskipulagi velferðarsviðs og skóla- og frístundasviðs. Af þeim verður 32 starfsmönnum boðið nýtt eða breytt starf en 54 munu ekki fá áframhaldandi starf hjá borginni.
Þetta kemur fram í tilkynningu Reykjavíkurborgar eftir að borgarráð samþykkti í dag tillögu borgarstjóra um breytingarnar. Ný skipurit sviðanna taka gildi 1. september og á innleiðingu að vera að fullu lokið fyrir næstu áramót.
Áætlað er að breytingarnar skili um 900 milljóna króna hagræðingu á ársgrundvelli þegar þær hafa að fullu komið til framkvæmda. Sparnaðurinn verður meðal annars til vegna fækkunar stöðugilda, breytinga á stjórnskipulagi og lægri húsnæðiskostnaðar.
Með breytingunum verður stjórnendum og millistjórnendum fækkað en Reykjavíkurborg segir áherslu lagða á að verja framlínuþjónustu. Stjórnunar- og rekstrareiningum verður fækkað, verkaskipting gerð skýrari og boðleiðir styttar.
Verkefni miðstöðva, frístundamiðstöðva, Keðjunnar og Virknihúss verða færð inn í nýtt skipulag. Í stað þess að þjónusta byggist að stórum hluta á landfræðilegri hverfaskiptingu verður hún í auknum mæli skipulögð eftir faggreinum. Fagþekking á einstökum málaflokkum verður þannig sameinuð í stærri og sérhæfðari teymum.
Frá áramótum verður barna- og fjölskylduþjónusta ásamt skóla- og frístundaþjónustu með aðsetur í Borgartúni 12–14. Félags- og húsnæðisþjónusta verður hins vegar staðsett á Bíldshöfða 20. Markmiðið er meðal annars að börn og fjölskyldur geti sótt þjónustu á einn stað.
Þjónusta miðstöðvanna verður áfram veitt með óbreyttu fyrirkomulagi á meðan breytingarnar eru innleiddar, þó ekki lengur en til ársloka.
Reykjavíkurborg segir starfsemi og rekstur miðstöðvanna hafa dregist saman um 60 prósent frá því að málefni fatlaðs fólks voru færð frá miðstöðvunum til fagskrifstofu velferðarsviðs í ársbyrjun 2025.
Af þeim störfum sem hverfa eru 22 stöðugildi sem lögð verða niður þegar samningur Reykjavíkurborgar við ríkið um samræmda móttöku flóttamanna rennur út um næstu áramót.
„Með þessum breytingum erum við að einfalda skipulag borgarinnar, styrkja faglegt starf og skapa betri umgjörð um þjónustu við íbúa. Markmiðið er að tryggja að fjármunir borgarinnar nýtist sem best í þágu Reykvíkinga. Á sama tíma stöndum við vörð um þjónustuna, sem verður áfram nálægt íbúum, en að baki henni verða öflugri fagteymi, skýrari ábyrgð og styttri boðleiðir. Rekstrarstaða borgarinnar kallar á hagræðingu og því miður verður ekki komist hjá því að hún hafi áhrif á starfsfólk. Við höfum lagt megináherslu á að einfalda stjórnskipulagið og fækka stjórnendastöðugildum í miðlægri stjórnsýslu,“ segir Hildur Björnsdóttir borgarstjóri.
Athugasemdir