Tveir albanskir ríkisborgarar hafa verið ákærðir fyrir ýmiss konar brot en málið verður tekið fyrir í Héraðsdómi Reykjavíkur í maí.

Einstaklingarnir eru báðir ákærðir fyrir fíkniefnalagabrot, peningaþvætti og útlendingalagabrot en útlendingalagabrotin eru samkvæmt ákæru ítrekuð.

Annar einstaklingur er á fertugsaldri en hinn er á þrítugsaldri.

Jafnframt er krafist upptöku á samtals 94,89 g af amfetamíni, 42,87 g af kókaíni og 539,66 g af maríhúana og fimm farsímum en ætlað er að farsímarnir hafi verið notaðir við söludreifingu ólöglegra ávana- og fíkniefna.

Einnig er krafist upptöku á tæpri milljón í reiðufé og 100 dölum en reiðuféð er ætlaður ágóði af söludreifingu ólöglegra ávana- og fíkniefna.