Evgenía prinsessa hefur greint frá því að hún eigi von á sínu þriðja barni.

Evgenía, yngsta dóttir Andrews Mountbatten-Windsor og Söruh Ferguson, sem á þegar tvö börn með eiginmanni sínum Jack Brooksbank, tilkynnti gleðifréttirnar í yfirlýsingu.

Hjónin eiga tvo syni: Ágúst Fillipus Hauk Brooksbank, sem fæddist 9. febrúar 2021, og yngri bróður hans, Erni (e. Ernie) Georg Ronald (e. Ronnie) Brooksbank, sem verður þriggja ára 30. maí.

Buckingham Palace staðfesti tíðindin og kom fram að Karl Bretakonungur væri „mjög ánægður“ með fréttirnar. Með tilkynningunni fylgdi mynd þar sem synir Evgeníu horfa á sónarmynd.

Í yfirlýsingu frá höllinni segir: „Hennar konunglega hátign Evgenía prinsessa og herra Jack Brooksbank eru mjög ánægð með að tilkynna að þau eigi von á sínu þriðja barni, sem vænst er í sumar.

Ágúst (5 ára) og Ernir (2 ára) eru einnig mjög spenntir fyrir að fá nýtt systkini. Hans hátign konungurinn hefur verið upplýstur og er mjög ánægður með fréttirnar.“

Orðrómur um þriðju meðgöngu Evgeníu fór að heyrast þegar hún sást ásamt eiginmanni sínum og systur sinni, Betu Dísu prinsessa, á gangi í Mayfair í byrjun maí.

Myndir frá ferðinni fóru á samfélagsmiðla og töldu sumir sjá merki um vaxandi bumbu hennar. Vitni sagði að systurnar hefðu verið „í góðu skapi og notið sólarinnar“ í Lundúnum.

Samkvæmt heimildum hefur álag síðustu mánaða þó haft áhrif, sérstaklega á Betu Dísu prinsessu, sem sögð er eiga erfitt með að samræma fjölskyldutengsl og stöðu sína innan konungsfjölskyldunnar.

Líkamstjáningasérfræðingurinn Judi James sagði í samtali við Mirror að Evgenía sýndi sjálfstraust og brosti breitt fyrir myndavélunum, en að Beta Dís virtist minna örugg og bæri merki um álag.

Báðar systurnar hafa haldið sig til hlés að undanförnu á meðan foreldrar þeirra hafa verið tengdir Epstein-málinu. Faðir þeirra, Andrew, var sviptur titlum sínum og fluttur úr Royal Lodge-bústaðnum í kjölfar tengsla sinna við hinn dæmda barnaníðing.

Á 66 ára afmæli Andrews í febrúar var hann handtekinn grunaður um misferli í opinberu starfi. Hann var í haldi lögreglu í 11 klukkustundir áður en honum var sleppt. Lögreglan í Thames Valley hefur staðfest að hann sé til rannsóknar vegna ásakana um að hafa afhent Epstein trúnaðarupplýsingar á meðan hann gegndi starfi viðskiptasendimanns Bretlands.