Sjómaðurinn Sigurður Jóhann Jónasson gagnrýnir harðlega íslenska heilbrigðiskerfið eftir að sonur hans slasaðist alvarlega í slysi á hlaupahjóli og bíður enn eftir aðgerð.

Sigurður greinir frá málinu í færslu á Facebook og segir son sinn hafa dottið af hlaupahjóli 12. ágúst. Við fallið hafi hann brotnað á viðbeini og öxl og þurfi að gangast undir aðgerð vegna meiðslanna.

Að sögn Sigurðar hefur sonur hans hins vegar þurft að bíða heima eftir að komast í aðgerð þrátt fyrir mikla verki.

„Er farinn að sjá eftir því að vera Íslendingur. Sonur minn datt á hlaupahjóli, brotnaði viðbein og öxl,“ skrifar Sigurður.

Hann segir syni sínum hafa verið gert að fasta frá klukkan ellefu á kvöldin og bíða síðan eftir upplýsingum um hvort og hvenær hann komist í aðgerð. Segir Sigurður að þetta hafi endurtekið sig á meðan sonur hans bíði sárkvalinn.

Sigurður sparar ekki stóru orðin í gagnrýni sinni og segist vera „brjálaður“ yfir stöðunni.

„Mér grunar að hér séu mannréttindi brotin. Bæði axlarbein og viðbein standa út og suður og hann er bara á biðlista,“ skrifar Sigurður og gagnrýnir sérstaklega að sonur hans hafi ítrekað þurft að fasta vegna mögulegrar aðgerðar án þess að komast að.

Ekki liggur fyrir í færslu Sigurðar hvers vegna aðgerðin hefur dregist eða hvenær gert er ráð fyrir að sonur hans komist undir hnífinn.