Tveir menn, Arnas Alisauskas og Darius Burbulas, hafa verið dæmdir í þriggja mánaða skilorðsbundið fangelsi hvor fyrir innbrot í íbúð og þjófnað á skartgripum að verðmæti rúmlega 2,5 milljónir króna.

Mennirnir voru ákærðir fyrir að hafa brotist inn í íbúð á höfuðborgarsvæðinu 27. febrúar 2024. Samkvæmt ákæru spenntu þeir upp svaladyr íbúðarinnar og stálu þaðan skartgripum sem metnir voru á allt að 2.535.000 krónur.

Ákærðu mættu ekki við þingfestingu málsins í júní þrátt fyrir að fyrirkall hefði verið birt í Lögbirtingablaðinu. Þar hafði verið tekið fram að fjarvera þeirra gæti verið metin til jafns við viðurkenningu á brotinu. Málið var því tekið til dóms að þeim fjarstöddum.

Dómurinn taldi sannað af gögnum málsins að mennirnir hefðu framið þjófnaðinn. Engar upplýsingar lágu fyrir um að þeir hefðu áður gerst sekir um refsiverða háttsemi.

Hvor þeirra var dæmdur í þriggja mánaða fangelsi. Fullnustu refsingarinnar var þó frestað og fellur hún niður að tveimur árum liðnum haldi þeir almennt skilorð.

Við ákvörðun refsingar var meðal annars litið til óútskýrðra tafa á rannsókn og meðferð málsins. Rúm tvö ár liðu frá því brotið var framið þar til ákæra var gefin út.

Mönnunum var jafnframt gert að greiða brotaþola óskipt 2.535.000 krónur í skaðabætur, auk vaxta og dráttarvaxta.