Einstakt og vel staðsett einbýlishús við Merkurgötu 9 í Hafnarfirði hefur verið sett á sölu á 111,9 milljónir króna.

Um er að ræða fallegt og sjarmerandi timburhús sem reist var árið 1909 og stendur í grónu og vinsælu hverfi í miðbæ Hafnarfjarðar.

Húsið skiptist í kjallara, hæð og ris. Kjallarinn er um 45 fermetrar að stærð en er ekki inn í skráðri heildarfermetratölu eignarinnar. Eignin hefur fengið gott viðhald á síðustu árum, meðal annars hefur verið skipt um glugga á austurhlið hússins og nýtt bárujárn sett á tvær hliðar þess.

Innandyra hefur húsinu verið haldið í upprunalegum og hlýlegum stíl sem endurspeglar vel aldur þess og karakter. Frá stofu er útgengt út á rúmgóðan sólpall þar sem heitur pottur setur svip sinn á útiaðstöðuna.

Merkurgata 9 sameinar sögulegan sjarma og nútímaleg þægindi á eftirsóttum stað í Hafnarfirði og gæti því vakið athygli þeirra sem leita að einstöku heimili með mikla sögu og persónuleika.