Lögreglan á Norðurlandi eystra hefur í tvígang hætt rannsókn á meintu kynferðisbroti gegn leikskólabarni á Akureyri, þar sem ekkert kom fram sem studdi ásakanir í málinu. Þetta kemur fram í tilkynningu frá embættinu sem lögreglan birti á Facebook, í kjölfar umræðu um málið.
Málið var upphaflega tilkynnt til lögreglu í ágúst 2024 af hálfu barnaverndar, eftir að aðstandandi barns greindi frá því að ungur maður hefði sýnt barninu óviðeigandi hegðun. Samkvæmt lögreglu beindist rannsóknin einkum að grun um kynferðislega áreitni vegna meintra kossa.
Við rannsókn málsins komu þó ekki fram gögn sem studdu framburð aðstandanda og var rannsókn hætt í október sama ár. Sú ákvörðun var kærð til Ríkissaksóknara.
Á meðan kæran var til meðferðar bárust lögreglu nýjar upplýsingar frá barnavernd um að maðurinn hefði játað kynferðislega áreitni fyrir ættingja sínum. Í kjölfarið var rannsóknin tekin upp að nýju, en laut að sömu atriðum og áður.
Að sögn lögreglu komu heldur ekki fram ný gögn í þetta skiptið sem studdu ásakanirnar við þá rannsókn og var málinu því lokað á ný í desember 2024. Sú niðurstaða var aftur kærð til Ríkissaksóknara, sem staðfesti ákvörðun lögreglu í apríl 2025.
Barnið fékk réttargæslumann við rannsókn málsins og hefur nýr lögmaður nú tekið það að sér. Lögregla segir að foreldrar hafi verið hvattir til að koma fram með nýjar upplýsingar ef þær væru til staðar, en engar slíkar upplýsingar hafi borist.
Samkvæmt lögreglu liggur því ekki fyrir rökstuddur grunur um að maðurinn hafi gerst brotlegur gagnvart barninu. Embættið segist ekki ætla að tjá sig frekar um málið.
