Heimasíður og tölvupóstkerfi fjölmargra fyrirtækja og stofnana á Austurlandi lágu niðri í gær eftir netárás á hýsingarþjónustu Austurnets. Samkvæmt fyrirtækinu bendir ekkert til þess að gögnum hafi verið stolið, að því er fram kemur í frétt Austurfréttar.
Árásin var gerð í fyrrakvöld og hafði áhrif á um 100 viðskiptavini Austurnets, þar á meðal Austurfrétt, AFL Starfsgreinafélag, Fljótsdalshrepp og Náttúrustofu Austurlands. Starfsmenn Austurnets hófu þegar endurheimt úr öryggisafritum og tókst að koma þjónustunni smám saman í lag.
Um var að ræða svokallaða lausnargjaldsárás (e. ransomware), þar sem árásaraðilar reyna yfirleitt að taka gögn í gíslingu og krefjast greiðslu fyrir að skila þeim. Í þessu tilviki virðist slíkt þó ekki hafa tekist.
Málið var tilkynnt til CERT-IS, netöryggissveitar íslenskra stjórnvalda. Magni R. Sigurðsson, framkvæmdastjóri sveitarinnar, segir jákvætt að engin merki séu um gagnaleka en bendir á að árásum af þessu tagi fari sífellt fjölgandi.
Gervigreindin auðveldar netárásir
Hann segir rekja megi aukninguna meðal annars til framfara í gervigreind sem geri netglæpamönnum auðveldara að finna veikleika í tölvukerfum og framkvæma árásir. Jafnframt sé sífellt erfiðara að hafa uppi á gerendum þar sem þeir noti meðal annars sýndarnet (VPN) og önnur úrræði til að dylja slóð sína.
Magni hvetur fyrirtæki til að halda tölvukerfum sínum vel uppfærðum og starfsfólk til að sýna aðgát gagnvart vefveiðum og grunsamlegum skilaboðum, enda séu slík brögð enn ein algengasta leið netárásarmanna til að komast inn í kerfi.
