Þrítugur karlmaður hefur verið ákærður fyrir peningaþvætti en lögreglustjórinn á Suðurnesjum er ákærandi í málinu.

Hann er ákærður fyrir peningaþvætti með því að hafa á tímabilinu 30. október 2025 til 1. nóvember 2025 tekið við samtals 4.005.000 kr. í reiðufé frá óþekktum aðila eða aðilum en honum gat ekki dulist að um væri að ræða ávinning af refsiverðum brotum.

Hann var með reiðuféð í fórum sínum þegar hann var handtekinn í Flugstöð Leifs Eiríkssonar þann 1. nóvember 2025 á leið til Riga í Lettlandi.

Þess er krafist að ákærði verði dæmdur til refsingar og til greiðslu alls sakarkostnaðar. Þá er þess krafist að gerðar verði upptækar með dómi samtals 4.005.000 kr. sem lögregla fann og haldlagði.

Málið verður tekið fyrir Héraðsdómi Reykjaness í maí.