Sveinn Andri Sveinsson lögmaður segir rök andstæðinga aðildarviðræðna við Evrópusambandið minna mjög á þau sem notuð voru gegn aðild Íslands að EFTA fyrir meira en hálfri öld.

Í Facebook-færslu sem hann birti í dag rifjar Sveinn Andri upp að Þjóðviljinn, málgagn Alþýðubandalagsins á sínum tíma, hafi barist harðlega gegn inngöngu Íslands í EFTA. Birtir hann skjáskot af Þjóðviljanum þar sem finna má tvær greinar gegn EFTA. Segir hann að Þjóðviljinn hafi á sínum tíma verið kallað „Málgagn hins neikvæða nöldurs”.

Hann segir að röksemdirnar sem þá voru settar fram séu „býsna kunnuglegar“ og eigi sér skýrar hliðstæður í umræðunni um Evrópusambandið í dag.

Sveinn Andri nefnir sérstaklega Sigmund Davíð Gunnlaugsson, Diljá Mist Einarsdóttur og Ragnar Árnason og segir þau nú flytja sambærileg sjónarmið og andstæðingar EFTA-aðildar gerðu árið 1969. Jafnframt segir hann að hlutverk fjölmiðla hafi að nokkru leyti snúist við.

„Nú eru Sigmundur Davíð og Diljá Mist okkar Guðmundur Jaki og Adda Bára og Ragnar Árnason er Þröstur Ólafsson dagsins í dag, rökin gegn aðildarviðræðum að ESB nákvæmlega þau sömu og 1969 gegn EFTA og nú er Morgunblaðið málgagn hins neikvæða nöldurs.“

Segir gömul sjónarmið ekki eiga erindi í dag

Í færslunni gagnrýnir Sveinn Andri það sem hann kallar neikvæðni og fortíðarhyggju í umræðunni um Evrópumál.

„Er einhver til í að segja þessu fólki að sjöundi áratugurinn hringdi og vill fá aftur neikvæðnina sína, nöldrið og nagið,“ skrifar hann.

Að mati lögmannsins eiga þau sjónarmið sem einkenndu umræðuna á þeim tíma ekki lengur við.

„Músarholusjónarmið þessa tíma eru ekki til endurbrúks,“ segir Sveinn Andri að lokum.