Timburhúsið við Laugaveg 76A í Reykjavík hefur verið sett á sölu þar sem óskað er eftir tilboðum í eignina. Húsið var reist árið 1920 og stendur á 279,8 fermetra eignarlóð á eftirsóttum stað í miðborg Reykjavíkur.

Um er að ræða sjö herbergja hús á þremur hæðum sem hefur verið skipt upp í þrjár íbúðir. Samkvæmt skráningu er húsið 213,1 fermetri að stærð. Aðalíbúð er í húsinu ásamt tveimur aukaíbúðum sem hafa sérinnganga.

Húsið er timburhús með járnklæddu þaki og standandi báruklæðningu. Gluggar og hurðir eru úr timbri. Lóðin hefur verið frágengin með möl og timburpallettur hafa verið nýttar sem pallur við aðra aukaíbúðina. Þá liggur steypt stétt að hinni aukaíbúðinni frá steyptum stiga við inngang aðalíbúðar.

Í sölugögnum kemur fram að seljandi hafi ekki búið í eigninni og geti því ekki veitt ítarlegar upplýsingar um ástand hennar umfram það sem fram kemur í söluyfirliti. Eignin er því seld í því ástandi sem hún er og hyggst seljandi ekki ráðast í neinar endurbætur fyrir sölu eða afhendingu.

Af þeim sökum eru væntanlegir kaupendur hvattir til að kynna sér ástand fasteignarinnar vel áður en tilboði er skilað og leita eftir atvikum til sérfræðinga til að framkvæma nánari skoðun á húsinu.

Laugavegur 76A er staðsettur í hjarta Reykjavíkur þar sem stutt er í verslun, þjónustu, veitingastaði og aðra miðbæjarstarfsemi.