Að minnsta kosti þrír létust og um 40 manns slösuðust þegar tröllatorfærubíll ók inn í áhorfendahóp á sýningu í borginni Popayán í Kólumbíu í gær

Slysið varð á útiviðburðinum „Popayán Monster Truck 2026“, þar sem einnig voru sýndar BMX- og mótorkrosslistir. Myndskeið frá vettvangi sýna áhorfendur standa bak við öryggishindranir meðan tröllatorfærubíll framkvæmir stökk og aðrar listir. Skyndilega virðist ökumaður missa stjórn á ökutækinu, sem stefnir þá beint inn í mannfjöldann.

Vitni segja að ringulreið hafi skapast á örfáum sekúndum þegar fólk reyndi að forða sér undan bílnum. Sjúkrabílar og slökkvilið voru fljótt send á staðinn og slasaðir fluttir á nærliggjandi sjúkrahús.

Borgarstjórinn í Popayán, Juan Carlos Muñoz, sagði daginn vera „afar sársaukafullan“ fyrir borgina og að yfirvöld ynnu nú að því að rannsaka orsök slyssins.

Samkvæmt fyrstu upplýsingum benda vísbendingar til þess að um vélarbilun hafi verið að ræða. Lögregla telur mögulegt að brestur í hemlakerfi hafi valdið því að bíllinn ók stjórnlaust inn í áhorfendasvæðið.

Ríkisstjóri Cauca-héraðs, Octavio Guzmán, staðfesti að umfangsmiklar björgunaraðgerðir hefðu strax verið settar af stað til að bregðast við slysinu.

Rannsókn stendur nú yfir á vegum yfirvalda sem ætla að kanna hvort hægt hefði verið að koma í veg fyrir harmleikinn með auknum öryggisráðstöfunum eða tæknilegu eftirliti með ökutækinu.