Herdís Kjerulf Þorgeirsdóttir, lögmaður og fyrrverandi forsetaframbjóðandi, varar við því að Ljósleiðarinn verði seldur úr opinberri eigu. Hún segir slíka sölu geta skapað verulega áhættu fyrir almannahagsmuni og þjóðaröryggi, enda sé um að ræða mikilvæga fjarskiptainnviði landsins.
Í færslu á Facebook sem birtist á dögunum, bendir Herdís á að reynslan af sölu Landssíma Íslands og grunnfjarskiptakerfisins fyrir bankahrunið ætti að vera stjórnvöldum víti til varnaðar.
„Í aðdraganda hrunsins seldi ríkið Landssíma Íslands ásamt grunnfjarskiptakerfinu til einkafjárfesta. Grunnnet Landssímans varð síðar hluti af Mílu, sem árið 2022 var seld franska fjárfestingarfélaginu Ardian,“ skrifar hún.
Herdís bendir á að meðal hluthafa Ardian sé franski tískurisinn Hermès og segir eignatengsl íslenskra fjarskiptainnviða þannig teygja sig inn í heim alþjóðlegra fjármála og lúxusvarnings, fjarri þeim almannahagsmunum sem innviðirnir eigi að þjóna.
Hún vísar jafnframt til þess að stjórnvöld í Noregi og Svíþjóð tryggi verulegt opinbert eignarhald á fjarskiptainnviðum.
Míla fékk 200 milljóna króna sekt
Herdís segir sölu Mílu til Ardian hafa verið svo mikilvæga frá sjónarhóli þjóðaröryggis að þjóðaröryggisráð hafi fjallað ítrekað um hana. Stjórnvöld hafi þó leyft söluna að ganga eftir en gert sérstakan samning um öryggiskvaðir.
Hún bendir á að Míla hafi verið með um 65 prósenta hlutdeild á heildstæðum markaði fyrir gagnaflutning, samkvæmt mati Samkeppniseftirlitsins. Eftirlitið hafi jafnframt lagt áherslu á mikilvægi Ljósleiðarans, sem er í eigu Orkuveitu Reykjavíkur, sem sjálfstæðs keppinautar Mílu.
Samkvæmt færslu Herdísar setti Samkeppniseftirlitið ströng skilyrði fyrir kaupum Ardian á Mílu til að vernda samkeppni. Hún segir Mílu hafa brotið þau skilyrði fljótlega með háttsemi sem hafi verið til þess fallin að hindra viðskipti Símans við keppinauta Mílu.
„Fyrir brotin hlaut fyrirtækið 200 milljóna króna stjórnvaldssekt sl. vor,“ skrifar hún.
Segir sparnaðaráform ekki réttlæta söluna
Herdís hefur áhyggjur af því að nú standi jafnvel til að selja Ljósleiðarann úr opinberri eigu og telur slíkt geta veikt stöðu almennings og öryggi fjarskiptakerfisins.
„Þjóðaröryggi, fjarskiptaöryggi og aðgangur almennings að nauðsynlegri fjarskiptaþjónustu eru of mikilvægir hagsmunir til að stjórnvöld geti litið á sölu Ljósleiðarans sem skref í sparnaðaráformum,“ segir hún.
Í lok færslunnar spyr Herdís hvernig stjórnvöld hyggist tryggja grundvallarhagsmuni þjóðarinnar þegar yfirráð yfir mikilvægustu fjarskiptainnviðum landsins séu komin í hendur einkafjárfesta.
„Vart er hægt að búast við því að þeir fórni eigin arðsemiskröfum í þágu íslensks almennings,“ skrifar hún.
Athugasemdir