Hólmfríður segir spillingarfnyk leggja frá Efstaleiti: „Skammist ykkar!“

Frétta­stjóri Mannlífs segir ráðn­ingu Þjóð­leik­hús­stjóra löngu hafa verið ákveðna. Nú eigi að end­ur­taka leik­inn með ráðn­ingu nýs útvarps­stjóra. Ólykt leggi frá Efsta­leiti. Fnyk af spill­ingu og fyr­ir­fram ákveð­inni nið­ur­stöðu.

„Löngu áður en mennta- og menn­ing­ar­mála­ráð­herra til­kynnti um ráðn­ingu nýs Þjóð­leik­hús­stjóra var alvega sama við hvern var rætt; stjórn­mála­menn, blaða­menn, leikna eða lærða.. allir hvísl­uðu verst geymda leynd­ar­mál­inu 2019; starf útvarps­stjóra yrði laust til umsóknar innan tíðar. Ráðn­ing­ar­ferlið í Þjóð­leik­hús­inu var sjón­ar­spil. Og það sama virð­ist nú vera uppi á ten­ingnum í Efsta­leiti.“

Þetta ritar Hólm­fríður Gísla­dóttir, frétta­stjóri Mannlífs í leið­ara í nýjasta tölu­blaði blaðs­ins, en leið­ar­inn hefur vakið tölu­verða athygli. Tilefni skrif­anna er sú ákvörðun stjórnar RÚV að vilja ekki birta nöfn umsækj­enda um stöðu útvarps­stjóra. Sem kunn­ugt er hefur ákvörð­unin verið harð­lega gagn­rýnd, en stjórn RÚV hefur kosið að verja hana með þeim rökum að ráð­gjaf­ar­fyr­ir­tæki, sem hefur verið henni innan handar í ferl­inu, telji að hæf­ara fólk muni sækja um stöð­una verði nöfn umsækj­enda ekki gerð opin­ber. Frétta­stjóri Mannlífs gefur hins vegar ekki mikið fyrir þá útskýr­ingu. „Þvílíkt endemis bull. Sá sem hefur hæfi­leika og metnað til að sækja um stöðu útvarps­stjóra er ekki í þeirri stöðu að þurfa að leyna því.“

Segir frétt­stjór­inn að stjórn Rík­is­út­varps­ins vilji ein­fald­lega fá að velja í stól­inn bak við luktar dyr. „Er nema von að menn spyrji hvort búið sé að taka ákvörð­un­ina? Hvort málið snú­ist ekki um að fá hæf­ustu umsækj­end­urna heldur rétta umsækj­and­ann? Þurftu menn e.t.v. viku til við­bótar til að sjá hvernig stemn­ingin yrði í þjóð­fé­lag­inu, hvort við myndum ekki bara sætta okkur við að fá ekki að vita, hvort plottið myndi ganga upp?“

Hér er hægt að lesa leiðar­ann í heild sinni.