Bolli Kristinsson kaupmaður sár: Kolbrún kallar mig tuðara

Bolli Krist­ins­son, kaup­maður og bar­áttu­maður fyrir breyttu skipu­lagi í Reykja­vík og brott­hvarfi Dags B. Egg­erts­sonar borg­ar­stjóra, er sár vegna leið­ara­skrifa Kol­brúnar Berg­þórs­dóttur í Frétta­blað­inu.

„Þar notar hún þann dálk blaðs­ins þar sem rit­stjórn­ar­stefnan kemur fram til að úthúða mér og kallar mig „tuð­ara“ vegna aug­lýs­ingar sem ég hafði meðal ann­ars fengið birta í hennar blaði, Frétta­blað­inu,“ skrifar Bolli í aðsendri grein í Frétta­blað­inu og botnar lítið í leið­ara­höf­undi að skrifa með svo nei­kvæðum hætti um aug­lýsanda sinn.

Bolli segir að í aug­lýs­ing­unni hafi hann meðal ann­ars farið yfir 19 atriði sem sýni svo ekki verði um villst í hvers konar öng­stræti stjórnun Reykja­vík­ur­borgar sé komið undir stjórn Dags B. Egg­erts­sonar.

„Þetta er ekki í fyrsta skipti sem Kolbrún stingur niður penna og gerir lítið úr bar­áttu minni og afger­andi meiri­hluta rekstr­ar­að­ila í mið­bænum gegn lok­unum gatna sem hafa valdið gríð­ar­legu tjóni og fyr­ir­tækjaflótta sem sér ekki fyrir end­ann á,“ segir Bolli. Hann segir að Kolbrún geri til­raun til að geng­is­fella sig fyrir þær sakir að hann búi á Spáni hluta úr ári og hefði þannig ekki gengið um götur borg­ar­innar.

„Þeim báðum, Degi og Kolbrúnu, láð­ist að minna á að ég bý líka hluta úr ári á Lauga­vegi og við þá götu hef ég starfað stærstan hluta ævinnar og búið með hléum um ára­tuga­skeið. Öllum má ljóst vera að Lauga­veg­ur­inn, eina skil­greinda versl­un­ar­gata Reykja­víkur og aðal­versl­un­ar­gatan, er að breyt­ast hratt og örugg­lega í drauga­stræti.“

Hann segir að við Laugaveg sé laust rými með rúm­lega 27 metra milli­bili og vill að Dagur og Kolbrún komi í göngu­ferð til að upp­lifa og sjá drauga­byggð­ina.

„Það er ógn­vekj­andi stað­reynd sem Kolbrún kýs að horfa fram hjá, rétt eins og borg­ar­stjór­inn. Dagur B. Egg­erts­son hefur ekki enn svarað boði mínu og félaga minna í Mið­bæj­ar­fé­lag­inu í Reykja­vík um að ganga með honum göt­una svo að hann fái að kynna sér hvernig ástandið raun­veru­lega er. Við lifum í þeirri veiku von að hann sjái ljósið. Okkur langar líka að bjóða Kolbrúnu með okkur í göngu­ferð um svæðið, hvort sem borg­ar­stjór­inn verður með í för eða ekki. Það er engin ástæða til að ótt­ast okkur kaup­menn,“ segir hann.

Hann er þó ekki bjart­sýnn á það að Kolbrún og Dagur láti undan.

„Nei, því skal bara mætt með skæt­ingi og yfir­læti. Það er samt aldrei of seint að sjá að
sér og boðið í göngu­ferð­ina stendur enn opið,“ skrifar sátt­fús Bolli.