Erlendur ferðamaður á sjötugsaldri lést í Almannagjá á laugardaginn.
Í frétt á mbl.is kemur fram að mikill viðbúnaður hafi verið í Almannagjá á laugardaginn síðastliðinn, vegna bráðra veikinda erlends ferðamanns. Bráðaliðar Heilbrigðisstofnunar Suðurlands ásamt starfsfólki þjóðgarðins veittu manninum fyrstu aðstoð.
Þyrla Landhelgisgæslunnar, lögregla og sjúkraflutningamenn frá Reykjavík og Selfossi komu á staðinn. Lífgunartilraunir báru ekki árangur og var maðurinn úrskurðaður látinn á staðnum.
Í samtali við Morgunblaðið sagði Einar Á.E. Sæmundsen þjóðagarðsvörður: „Auðvitað er fólki brugðið við svona atvik, en mikill fjöldi fólks var á svæðinu og sá hvað gerðist og hverju fram fór. Svona atburðir reyna líka mikið til dæmis á starfsfólkið okkar sem annars þarf að sinna ólíkum og krefjandi verkefnum. Þegar á svæðinu eru 4.000 til 6.000 manns á dag, eins og er nú um hásumarið, má alltaf búast við óvæntum atvikum líkum þessum, sem brugðist er við eftir bestu getu.“
Athugasemdir